El Centru Asturianu de Madrid anunció en xineru que'l ganador del "Premio Urogallo de Bronce", na estaya de llingua asturiana, yera na convocatoria de 2012, Inaciu Galán y González, periodista, escritor y presidente d’Iniciativa pol Asturianu. Nel salón d'actos de la Feria Internacional de Muestres d’Asturies, en Xixón, entregóse esti gallardón xunto al restu de reconocimientos d’esti Centru. Na entrega participaron l’alcaldesa de Xixón, Carmen Moriyón, la presidente del Conseyu de Comunidaes Asturianes, Paz Fernández Felgueroso, y autoridaes del Centru Asturianu de Madrid, nun actu presentáu por Janel Cuesta.
El premiu reconoz la trayectoria de persones que trabayen a favor del asturianu en distintes estayes y vien entregándose dende l’añu 1986. Dende entós recibiéronlu persones como Mª Josefa Canellada, Xosé Lluis García Arias, Roberto González-Quevedo, Jesús Neira, Nené Losada, Lluis Xabel Álvarez “Texuca”, Ramón d’Andrés, Ana Cano, Próspero Morán, Mánfer de la Llera, Eshter García, Xuan Bello o Berta Piñán, ente otros, y l’Academia de la Llingua Asturiana y Ediciones Trabe.
Comentarios