13 de Xullo

A Galería de Verán | Luns 13 de xullo | Radio Estrada

Arrincamos a semana repasando as consecuencias das intensas treboadas da fin de semana, que deixaron sarabia en distintos puntos da comarca e obrigaron a suspender o Festival Folk de Callobre.

Nesta edición recibimos nos estudos a unha familia de 6 peregrinos de Murcia, que están a percorrer o Camiño da Geira e dos Arrieiros, a ruta xacobea que atravesa o concello da Estrada. Con eles falamos da experiencia de camiñar cara a Santiago, das paisaxes, da hospitalidade galega e das emocións que se viven quilómetro tras quilómetro.

Nas efemérides lembramos o Día Mundial do Rock, o legado do histórico concerto Live Aid, o nacemento de Harrison Ford e achegámonos á semana da Virxe do Carme, unha das celebracións máis sentidas da costa galega.

Na segunda hora conversamos con Juan José Rial Millán, patrón maior da Confraría da Illa de Arousa, para coñecer como se preparan os mariñeiros para a festa da súa patroa e descubrir as tradicións que fan do Carme unha cita imprescindible no calendario galego.

Ademais, resolvemos a porra futbolística da semana pasada, abrimos unha nova pensando no próximo España–Francia con Antón Lueiro, escoitamos a participación dos oíntes e acompañamos a mañá cunha selección de grandes éxitos do pop nacional e internacional.

A Galería de Verán, o magazine de Radio Estrada para vivir o verán con información, entrevistas, música e moita participación.