Korrikaren 16. edizioa 2009ko martxoaren 26an hasi zen Tuteran, eta, 2.503 km egin eta gero, apirilaren 5ean amaitu zen Gasteizen. Azaroan, bost bat hil lehenago, egin zen edizio horren aurkezpena, eta honelaxe mintzo ziren AEKren arduradunak: “Korrika 16 Tuteran hasiko da martxoaren 26an, eta Gasteizen
bukatuko da apirilaren 5ean. Tuteran hasiko da, oraingoan Korrikaren hasiera Euskal Herriko hegoaldera eraman nahi izan dugulako, Korrikaren konpromisoa delako, ahal den neurrian, Korrika inoiz igaro edo hasi ez den lekuetara ere eramatea. Gainera, Nafarroako hegoaldean euskararen egoera bereziki latza da, eta Korrika 16ren hasierarekin euskararen aldeko aldarria beti bezain ozen zabaltzearekin batera, Erriberako AEKri eta bertako euskaldun eta euskaltzale guztiei gure errekonozimendua adierazi nahi diegu. Bestalde, Gasteiz izan da azken urteetan, barne- eta kanpo-migrazioaren eraginez, hazkunde handiena izan duen hiriburua; beraz, Korrika 16ren leloa ezin aproposago atxikitzen zaio, eta berriro bukaera Gasteizera eramateko garaia bazela ere
uste dugu, bertan bukatu zen azkenekoa 9. Korrika izan baitzen”
Comments