HIRU KATU Elkarrekin Haziz elkartea, Maitane Domenchekin eta Lorea Molinarekin

Elkarrekin Haziz elkartea hezkuntzaren profesionalen taldea da, formakuntzan eta umeen zaintzan eskarmentu handikoa. Talde honek hezitzaile baten etxean 0-3 urtetako bitartekoei egokitutako zerbitzua eskaintzen du. Bertako kide Maitane Domench, elkarteko koordinatzaile ohia, eta Lorea Molina, Burlatako Amets etxeko hezitzailea, izan ditugu gaurko gure solaskideak. Lorearen eta Maitaneren ahotsetatik proiektuaren sorrera, jatorria, abantailak, ezaugarriak eta euren egunerokoak ezagutu ditugu. Argi mintzatu dira, haurraren garapenaren hasierako urte hauek umearen geroari begira erabat erabakigarria direla azpimarratu digutenean, norbanakoaren autoestimua bermatzeko aldera. Hori dela eta, giro etxekoi eta amultsu bati esker lau umez osatutako talde txikietan lokarri egonkorrak eta hezkuntza proiektu zehatza eskaintzen dituzte. Etengabe aberasten eta hazten ari den bizi proiektua da Elkarrekin Haziz eta guretzat plazerra izan da gizarte eredu eraldatzailea bultzatzen duen egitasmo zoragarri hau gurean izatea. Bide batez, hezitzaile bila dabiltzala adierazi digute, beraz, interesa duzuenok eurekin harremanetan jarri zaitezkete 644716292 telefono zenbakira deituz, correocreciendojuntos@gmail.com kontura mezua bidaliz, zein whatsppez, Instagram edo Facebook bidez. Irratsaioan Igor Elortzaren “Anonyme Popular” ikuskizunari ere tartea eskaini diogu, Rafa Ruedarekin eta Oier Zuñiga iruindarrarekin osatu duen ikuskizunari buruz. Lapitza zorroztu eta ahobizarrik gabe hitz egin du auzi pertsonalez eta aldi berean kolektiboez. Bere pentsamenduak biluztu ditu, gero edertasunez jantzi eta zintzoki konpartitzeko. Igorren ikuskizun honek defendatzen du gaur egungo heroiak kalean gabiltzan norbanakoak garela, elkar gurutzatzen ditugunak, nahiz eta askotan elkarri begiratu ere ez egin. Hori dela azkenean Anonyme Popular hori. Ideia hori, norbait baina edonor, Igor baina inor. Irratsaioaren amaiera aldera, Roberrek Iruña Rock 2023 jaialdiaren aurkezpena egin digu, martxoaren 31n eta apirilaren 1ean Nafarroa Arenan izango den musika jaialdia, alegia. Besteren artean, Bala, Natos y Waor, Narco, Su Ta Gar, Ciudad Jara, Huntza, Lágrimas de Sangre, Banda Bassotti, Kaotiko, Jarfaiter, Kaos Urbano, Sons of Aguirre & Scila, Bala, Liher, La Topadora eta The Lizards taldeek osatzen dute jaialdiaren bosgarren edizio honetako behin-betiko kartela, milaka pertsona orroka eta dantzan jarriko dituztenak. Gure kide dugun Iosu Martiren Katanga Dub taldeak ere bere tokia izango du jaialdi honetan, Iruña Rockeko NMC agertokian arituko baita. Irratsaio potoloa atera zaigu labetik, baina osagai onez landutatakoa izaki, gustora emaitzarekin. Mila esker Lorea eta Maitane gurean izateagatik. Ekin, lagun, bideari, Son Gokurekin ez da beldurrik! Hurren arte!