Ibai Rodriguez oso pozik agertu da lortutako emoitzagaz

Ibai Rodriguez Espainiako txapelduna izan da Salbamendu eta Sorospeneko esprint probako senior modalidadean. Nojan eta Santanderren kopak irabazi ostean, durangarra izan da onena Castellonen urrezko domina lortuz. Hori dala eta, Ibai Rodriguez euki dogu Bizkai Irratiko mikrofonoetan txapeldun bilakatu ondoren.

Rodriguez dauela zortzi urte hasi zan ugerketan Durangoko Tabira klubean. Modalitate barri honetan lau urte pasata hasi zan eta emoitza oso onak lortu dauz. Mutil gaztea oso futbolaria izan da beti, eta une batzuetan bi kirolak uztartu ebazan. Rodriguezek onartu dau asmau egin ebala aukeraketan: "Txikitatik jokatu neban lagunekin futbolean, baina gero ugerketaren alde egiten neban".

Modalitate barri hau dauela lau urte baino ez zan jaio klubean, eta ordutik hona Rodriguez izan da onenetakoa. Onartzen dau modalitateak bere zailtasuna dauela, baina "entrenamentuagaz emoitza horreek lortu daitezke". Rodriguezek kirol honen aldeko apustu sendoa egin eban, futbola itxi eta bera bakarrik hasi zan ugerketan, inolako lagunik barik. Orain, kluba bere familia lakoa da eta lagun asko daukoz. Espainiako txapelketa irabazi ondoren, guztiez oroitu zan, bere familia barne, "eurak baitira ahalegin guztien atzean dagozanak".

Durangoko gazteak epe luzerako helburuak daukoz. Momentuz hurrengo lehiaketetan jartzen dau arreta baina selekzinoaren zerrendan egon eta munduko txapelketa batean parte hartzeko aukera be izan gura dau. Bere berbetan, esfortzuz dana iristen dala eta gauza guztietan egoteko burrukatuko dauala dino.