Palestinako hazien zaindaria

26 urte nituen eta Palestinara iritsi berria nintzen. Oraindik ez nuen ia inor ezagutzen. Nahiko galduta nengoen. Baina udaberriaren omenez nire pisukideak antolatu zuen barbakoa batean neska palestinar bat hurbildu zitzaidan. “Kaixo, Vivien Sansour naiz”, esan zidan, “iritsi berria zarela esan didate. Ongi etorri Palestinara”. Neska ezezagun hura limoi oso bat jaten ari zen, azalarekin eta guzti.