Goizeko Izarretan

Laga baketan Laga herri-plataformak alkarretaratzea egin eban pasa dan zapatuan Lagako hondartzan bertan, Espainiako Gobernuaren Costas-en Zuzendaritza Nagusiaren duna-berroneratze proiektuaren eta obren aurka protesta egiteko. Eder Corles Laga baketan Laga herri-plataformako kideak euren salaketea zertan datzan azaldu deusku. Laburbilduz, obra horren bidez duna artifizial bat eregi gura da egungo aparkalekuaren 4.000 m²-en gainean, lurra egokitu ondoren, makina astunekaz, hondartzako area hartuz eta beste aparkaleku bat eregitera behartuz, Lagako begiratokien ondoren, Laidarako norabidean, dagoan baso-eremua hautsiz. Egindako eskakizunen artean, euskal erakundeen esku-hartzea dago. Inplikatutako euskal erakundeek eta Espainiako Costas-ek proiektua publiko egitea eta proiektuaren arrazoiak, etorkizuneko asmoak, ingurumen-, gizarte- eta ekonomia-inpaktua azaltzea gura dabe. Ganera, esan dogun moduan, euren intentzinoa da euskal erakundeek esku har dezatela proiektu hori geldiarazteko, dagozan gabeziengaitik. Bitartean, alkarretaratze gehiago egingo dabez hurrengo hilabeteetan. Litekeena da hurrengoa maiatzaren 31n izatea.

Industria geurean zelan dagoan jakin nahi izan dogu gaur, ziurbakotasun egoerea bizi dogulako. Hori beste gai batzuen artean, eta argibideak emoteko geugaz euki dogu Mikel Jauregi Industria, Trantsizino energetiko eta Jasangarritasun sailburua. Jauregik Tubos Reunidos enpresaren azken ordua plazaratu deusku: "Hartzekodunen konkurtsoan sartu da enpresa. Prozesua aurrera doa, eragile guztiokaz berbetan. Gauza bi egiten dabilz: funtzionetan jarraitu eta etorkizuna aztertu". Behin hartzekodunen konkurtsoan sartuta, beste ate batzuk zabaltzen dira: "Zorra murrizteko aukerea heltzen jako enpresari. Orain, bide legal hori zabalik dago". Inbersore barriei jagokenez, interesdun batzuk badagoz, baina "proposamen zehatzak" behar dira administratzaileak eta epaileak aztertzeko. Dana dala, sailburuak argi dauka inbersore barria beharrezkoa dala Tubos Reunidosen etorkizuna bermatzeko. Dana dala, adibide positiboak be badagoz, Sestaoko ArcelorMittal enpresarena tartean. 150 milioi euro inbertidu ondoren, planta prest egongo da 1,6 Mt ekoizteko gehienezko gaitasunera iritsi ahal izateko, eta 2008tik ez zan horrelakorik gertatzen. Beraz, euskal industriaren egoerea egonkorra da: "Euskal industria hazten dabil. 2.000 lanpostu industrial gehiago dagoz momentu honetan orain dala urte bigaz alderatuta. Europako gainbehera ikusita, Euskadiko industria egonkortu da. Industria da Euskadiren ongizatea, aberastasuna eta aurrerapena bermatzeko tresna". Bestalde, CEBEKetik dinoe lan gatazkak, lan kostu handiak, absentismo handia… arazoa dirala eta sindikatuen jarreren kontra agertu dira. Eusko Jaurlaritza erdian dago: "Ulergarria dan moduan, bakotxak bere ikuspuntua azaltzen dau. Kasu honetan, geu erdian gagoz". Bitartean, inbertsinoak, enpresak edo erabakiguneak hemen mantentzea eta ez dagozanak erakartea be garrantzitsua da. Horretarako, Euskadiren indarguneak bultzatu behar dira, oztopoak gainditzeko.

Udako oporraldia helduko da laster. Geu kanpora goazen moduan, geurera be jente asko etorten da, gero eta gehiago, eta turistifikazinoak arazoak sortzen ditu edo sortu leikez. Honen aurrean turismo desazkunderako proposamena egiten deusku Asier Basurtok Argia agerkariagaz kaleratutako Turismoa. Desazkunderako bidaia liburuan. Hain zuzen be, aitatutako kezkatik abiatu zan Basurto lanari ekin eutsonean: "Azken urteetan asko nabarmendu dan kezka da. Holako liburu bat falta zan euskeraz, oinarri batzuk azaltzeko eta egoan hutsunea betetzeko". Dinogunez, orain gagoz turismoaren eraginak igarten, baina hazkundea lehendik etorri da. Izan be, hazkunde hori nahi izan da, geure inguruak turismorako egokitu doguzalako, diru iturri izateko: "Industria turistikoak sekulako eragina euki dau erakunde publikoetan. Politika publiko asko egin dira industria turistikoaren mesedetan, herritarren gehiengoarentzat mesedegarriak ziran ikusi barik". Horren harira, desazkunderako prozesuan komunidadearen garrantzia nabarmendu deusku Basurtok: "Bakotxak egiten dauanaren ondorioak danok pairatzen doguz. Ganera, ondorio batzuk oso larriak dira. Turismoak komunidade-loturak desegiten ditu".

Taize esperientzia bizitzeko deia egin dau Bilboko Elizbarrutiko Fede-zabalkunde eta Katekesirako Ordezkaritzako ume eta gazteei zuzendutako sailak. Esperientzia bagilaren 28tik garagarrilaren 5era burutuko dabe, aste horretan, adin, herrialde eta kultura askotako lagunak batzen diralako otoitz egiteko, hausnartzeko eta senidetasuna bultzatzeko, Maria Manrique Fede-Zabalkunde eta Katekesirako Ordezkaritzako ume eta gazteei zuzendutako saileko kideak esan deuskunez. Jarduera hiru talderi zuzenduta dago: kristau sarbideko azken txanpan dagozan gazteei, 18 eta 30 urte bitarteko gazteei eta helduei. Kontuak kontu, Fede-Zabalkunde eta Katekesirako Ordezkaritzatik bidea egin dabe hilabeteotan, Taize otoitzakaz. Kurtso honetako azkena, maiatzaren 28an izango da, 19:30etan, Bilboko Abandoko San Bizente Martiria parrokian. Esperientzia bizitzeko izena emon behar da. Informazino guztia Bilboko Elizbarrutiaren webgunean dago.

Bizipoza Jaia ospatuko dabe Berriatuan domekan. Jaia Bizipoza eta Helmugak alkarteek antolatuko dabe alkarregaz eta alkartasuna, euskerea eta inklusinoa izango ditu ardatz, Bizipozako Bizkaiko koordinatzailea dan Joanes Camarak esan deuskunez. Egun handia maiatzaren 24a izan arren, barikutik ekingo deutsie ospakizunari eta zapatuan be ez da egitasmorik faltako. Dana dala, aspalditik dabil Bizipoza Jaia aztarna uzten Lea-Artibain. Izan be, azken hilabeteetan eskualdeko herri ezbardinetara hurreratu dira aurkezpenak egitera. Ganera, ikastetxez ikastetxe be ibili dira. Lehen hezkuntzako ikasle guztiekaz eta baita irakasleekaz egin da lanketa. Bigarren hezkuntzako zentroetan Aspanovas eta Aspanogiren sensibilizazino hitzaldiak be antolatu dabez. Batetik, Bizipoza zer dan azaldu eta jaira gonbidapena zabaldu da. Bestetik, Bizipoza Eskolaren webguneko material didaktikoak eta edukiak azaldu dabez. Bizipoza Elkartea Euskerea eta alkartasuna oinarri, Euskal Herriko 39 alkartek, bazkideek, bababesleek eta boluntarioek osotzen dabe Bizipoza Elkartea. Beharrizan bereziak dabezan haur eta familien alkarte honeek egunero lantzen dabezan gaiak eta baloreak gizarteratzea, sensibilizazino lana egitea eta eragitea da Bizipoza Elkartearen egitekoa. Danona eta danontzat izan beharko leukeen gizarte inklusiboa eregiten ari dira, euskeratik eta euskeraz.

Politika gaiak eta gaurkotasuna aztertu doguz gaur, Iñigo Ansola Euzko Alderdi Jeltzaleko Bizkai Buru Batzarreko presidenteagaz. Elixabete Etxanobe Bizkaiko Ahaldun Nagusiak hausnarketea eskatu dau Bilbo 2030eko Munduko Futbol Txapelketako egoitzea izateaz, aurretik Donostiako alkateak egin eban legez. Ansolak dagozan zalantzetan sakondu dau: "Azterketa sakona egiten gabilz datu guztiekaz mahai gainean. Baldintza ekonomikoak oso exijenteak dira, baina gehiago dagoz: garraioa, FIFAk eskatzen dituan espazioak, beste ospakizunak ekidin behar izatea...". Sozialistek eta popularrek ez dabe arazorik ikusten eta kritika zorrotzak bota dabez. Bitartean, Euzko Alderdi Jeltzaleak hitzordu garrantzitsua dauka Durangon asteon, Aurrera Diharduen Herria goiburupean, datorren urteko hauteskundeetarako bidea hasteko. Dagoeneko hauteskunde makineria martxan dago: "2027ko maiatzaren 23an izango dira udal eta foru hauteskundeak. Euzko Alderdi Jeltzalea alderdi munizipalista izan da betidanik, behetik gora eratu dana". Horren harira, alkate izateko hautagai batzuen izenak ezagutu doguz dagoeneko, baina asko falta dira oindino, Bilbokoa tartean: "Hausnarketa hori oindino egiteke dago. Bere momentuan jakingo da jakin behar dana". Kontuak kontu, Ansola ez da kezkatuta agertu inkestek EH Bilduri emoten deutsien gorakadeagaitik. Bestalde, emoten dau Aitor Esteban eta Eneko Anduezaren artean ez dagoala sintonia onegirik. Ansolak gertatutakoari garrantzia kendu deutso eta normaltasunaren barruan kokatu ditu egondako tirabirak: "Gobernukideak gara toki askotan. Erabagi garrantzitsuak hartzen doguz egunero eta desadostasunak sortzen dira. Dana dala, harremana oso ona da". Amaitzeko, Enplegu Publikoaren Legeari jagokonez, euskera eskakizunen gaian Euzko Alderdi Jeltzaleak daukan jarrerea azaldu deusku Bizkai Buru Batzarreko presidenteak: "Guretzat euskera zutabe garrantzitsua da. Administrazino publikoan euskeraz atendiduak izateko eskubidea daukagu, baina lan eskaintza publikoek berme bat eukitea be gura dogu. Euskerea ezin da atxakia izan lan eskaintza publiko horreek eteteko".

Museoen Nazinoarteko Eguna ospatzen da gaur, maiatzaren 18an, eta geu batzuetan sartu gara Goizeko Izarretan irratsaioan. Gitxienez sei museo eta areto bi batzen dira Bizkaiko Foru Aldundiaren BizkaiKOA sarean, eta astegoienean ospakizun giroan ibili dira Bizkaiko museoak. Bisita itzazu, Bisita zaitez goiburupean. Asier Madarieta sare horretako arduradunak esan deuskunez, giro positiboa nagusitu da astegoienean: "Datuak batzen gabilz oindino, baina giroa ona izan da. Guggenheim inguruan ekitaldia egin genduan Bilbon eta jendea gustora egon zan". Ganera, aurtengo leloagaz azaldu gura ebena zer dan kontatu deusku: "Azken finean, gure museoek nortzuk garen erakusten dabe". MusEkintza jaialdia be egiten dabe BizkaiKOAkoek. MusEkintza jaialdiak diziplina artistiko desbardinetako ikuskizunak eskaintzen ditu eszenatoki berezietan: "Beste era bateko publikoarengana hurbiltzen gara MusEkintza jaialdian. Lekuak eta arte eszenikoak batzen doguz". Hurrengo ekitaldia zapatu honetan bertan izango da Bermeoko Arrantzaleen Museoan, Arrain Azokaren baitan. Izan be, Ai gure juaneteak! antzezlana egongo da ikusgai, arratsaldeko 19:00etatik aurrera. Bestalde, Euskerearen Etxeak jaso eban igaz Europako Kontseiluaren 2025eko Museo saria. Aitamen garrantzitsua, duda barik, Europa mailakoa gainera. Horren harira, Europako Museoen sariketea, EMYA, berton egingo da aurton. BizkaiKOAk antolakuntzan laguntzen dau: "Oso garrantzitsua da Bizkaian dagoan museo batek holako saria irabaztea, are gehiago euskerari buruzko museoa izanda". Kongresua bagilaren 10etik 14ra egingo da eta 300 bat ordezkari bertaratuko dira.

Eusko Jaurlaritzak pauso esanguratsu bat emon dau helduen euskalduntzean: Euskara Bonua jarriko dabe martxan. 120 euro ordainduta, lau urtez euskerea ikasi ahal izango da, B1A2 mailara arte. Ulibarri Euskaltegitik neurria begi onez hartu dabe, Loren Suarez zuzendariak esan deuskunez. Izan be, aukera paregabea iruditzen jake orain arte, Bilbon batez be, euskera ikastea urruti ikusi dauanarentzat. Ganera, aldaketa garrantzitsuak dagoz aurreko laguntzekiko: ikasleak berak erabagitzen dau zenbat ordu erabili ikasturte bakotxean, maila errepikatu daiteke nahi izanez gero eta etena ez da zigorra. Izan be, lehen, ikaslea itxi eta barriro hasi nahi bazan, ez eban laguntzarik berreskuratzen. Orain murrizketa hori desagertu egingo da. Esan bezala, doakotasunera hurbiltzeko urratsa txalotzen dabe Ulibarri Euskaltegitik. Halanda be, falta dana azpimarratu dabe: B1 osoa (B1A2 + B1B1) programa berean sartzea eta bidea C1 mailara arte luzatzea. Bitartean, aldarrikatu dabe kanpaina indartsuak behar dirala herritarrak benetan hurbildu daitezan.

Munduko Medikuak erakundeak Osasuna munduan eta nazioarteko laguntza izeneko txostena aurkeztu dau. Itziar Iraizabal Bizkaiko Medicus Mundiko presidenteak Bizkaia Irratian azaldu dauenez, osasuna oinarrizko eskubidea da, baina munduko herritar askok oraindino ez daukie osasun sistemarako sarbide egokirik. Erakundeak ohartarazi dau herrialde aberatsen eta pobretuen arteko aldea handia dala, eta horrek bizi-itxaropenean, gaixotasunen prebentzinoan eta tratamenduetan eragin zuzena daukala. Malaria, tuberkulosia edo bestelako gaixotasunak kontrolpean egon arren, baliabide faltak egoera barriro okertzea ekarri leike. Munduko Medikuak erakundeak nazinoarteko lankidetza indartzeko eskatu dau, baita lehen arreta sendoagoa bultzatzeko be. Itziar Irazabalen arabera, osasuna ez dago bakarrik ospitale edo botiken menpe; etxebizitza duina, ur edangarria, elikadura eta bizi-baldintza egokiak be ezinbestekoak dira.

ESK, LAB, UGT, ELA, CCOO eta Teknikariok sindikatuek deitu dabe mobilizaziora, bi urteko negoziazinoen ostean, patronalaren blokeoa salatzeko. Sindikatuek dinoenez, sektoreak prekaridade egoeran jarraitzen dau, eta hitzarmen kolektibo barri bat beharrezkoa dala nabarmendu dabe, lanaldiak, atsedenak eta kontziliazino neurriak hobetzeko. Ander Sierra soinu teknikariak Goizeko Izarretan irratsaioan adierazi dau ikus-entzunezko eta ekitaldien sektorea ezinbestekoa dala kultur jarduerentzat, baina langileen lan baldintzek ez dabela behar adinako autortzarik jasotzen. Mobilizazino gehiago iragarri dabez akordiorik ezean.

EHNE sindikatutik Unzalu Salterain-ek azaldu deuskunez, gaur egungo testuinguruan lehenengo sektoreak asko pairatzen dau nazinoarteko krisialdietan. Honen aurrean, kanpoko hainbesteko mendekotasunik ez eukiteko moduko eredua landu behar dala esan deusku. Zentzu horretan pausoak emoten dabilzala, gauzak martxan dagozala, baina denporea beharko dala emaitzak igarten hasteko. Gaurkoa San Isidro eguna da, baserritarrena, baina baita Nakba eguna be, eta gogoan hartuko dabe Urkiolan egingo daben ekitaldi baten. Eguerdiko 12.00etan ekimena egingo dabe 'Lurra, Palestina, Alkartasuna' goiburupean. Maite Aristegi Etxaldeko kidearen berbalditxoa, Txiplas-en bertsoak, Mahmud Darwish idazlearen poemen irakurraldia Marisa Barrenaren eskutik eta olibondo baten landaketea. Beste gai batzuk Lehenengo sektoreko belaunaldi aldaketeaz, gauzak ondo doazela azaldu deusku Unzalu Salterainek. Neurriak dagozala martxan gazteak baserri munduan sartzeko eta badabilzala sartzen. Mercosur akordioaz bere kezkea agertu deusku. Momentuz, behin-behinean indarrean dago eta hasi dira arazo batzuk sortzen. Esaterako, Brasiletik datorren okeleak ez dituala gitxieneko osasun arauak beteten. Europako Nekazaritza Politika bateratuari dagokionez, 2028tik aurrerako PACa negozietan dabilz gaur egun. Antza danez nahiko epe luzerako izango da eta alde onak bai ei daukaz. 

Gernika-Palestina Herri Ekimenak ekitaldi nazionala egingo dau zapatuan Gernikako Euskal Herria Museoan. Ibon Meñika Gernika-Palestina Herri Ekimeneko bozeroaleak antolatutakoaren inguruko xehetasunak emon deuskuz: "Barikuan Nakba Eguna da, data esanguratsua palestinarrentzat. Izan be, Israelek egindako garbiketa etnikoa ekarten dabe gogora, Israelgo Estaduaren sorreraren egun berean. Hori dala eta, ekitaldia egingo dogu zapatuan Gernikan". Hedabideotan palestinarren inguruan lehen baino informazino gitxiago emoten dogu. Bitartean, Gazan egoera kronifikatu dala dino Meñikak: "Israelek 850 pertsona erail ditu su-etenaren testuinguruan. Oso larria da". Bestalde, Sumud ontzidiak hasi eban bidaia, baina ezin izan eban ailegau, Israelek nazinoarteko uretan atzemon ebalako. Momentuz, ez dabe eurekaz berba egiteko aukerarik euki: "Ez dogu oindino eurekaz berbarik egin. Dana dala, zapatuko ekitaldia pasa dan urteko zemendian Donostiako Miramar Jauregian zabaldutako prozesuaren itxiera izango da. Donostiako ekitaldian Saif Abu Kesh egon zan geugaz, Global Sumud Flotillako koordinatzaileetako bat. Abu Kesh atxilotua izan da, tratu txarrak salatu ditu eta orain dala gitxi askatu dabe". Kontuak kontu, Gernika-Palestina Herri Ekimenak Palestinaren alde egiten jarraituko dau eta aurrera begira bere asmoak argi ditu.

Jurista eta ingurumen aditu talde batek Eusko Legebiltzarrean Urdaibaiko paduraren nortasun juridikoa autortzeko Herri Ekimen Legegilearen Lege Proposamena egin eta aurkeztu dau, Urdaibai Bada Nor! Roberto Uriarte, EHUko Zuzenbide irakaslea, talde horren parte da eta helburuaren barri emon deusku: "Nortasun juridikoa emon gura deutsagu Urdaibairi". Orain dala 42 urte, UNESCOk biosfera erreserba izendatu eban Urdaibai. Horren harira, arauak eta legeak dagoz Urdaibai babesteko. Halanda be, horregaz ez da nahiko: "Momentu honetan, badagoz tresna juridikoak, baina inoiz ez da nahiko". Orain, sinadurak batzeko prozesuari ekingo deutsie: 10.000 behar ditue hurrengo lau hilabetetan. Izan be, badagoz holako ekimenen aurrekariak, Zelanda Barrian edo Murtziako Mar Menorren.

Bilbao Metropoli 30 alkarteak 35 urte bete ditu aurton eta atzo gogoratu eta ospatu eben efemeride hau, Bilboko Euskalduna Jauregian hainbat konbidaugaz asanblea eginda. Bertan jakin eragin eben urte guzti honeetan presidentea izan dan Jose Antonio Garridok kargu hori itxiko dauala, eta Tomas Olanok hartu. Imanol Pradales lehendakaria buru zala egin eben ekitaldia, erakunde nagusienetako ordezkariekaz eta gizarteko ordezkaritza zabalagaz. Bilbao Metropoli 30 alkartea Bilboko metropoliaren urigintza eraldaketeaz arduratu da urte guzti honeetan eta horretan jarraitzen dau, orain begiradea 2050ean ipinita, Idoia Postigo zuzendariak esan deuskunez. 1991ean hasi eban bere bidea Bilbao Metropoli 30 alkarteak, eta egindako lana ezinbestekoa izan da gaur egun daukagun Bilboko eukiteko. Ondorioz, pozik eta harro dagoz: "Bilbao Metropolitano 30 krisialdi garaian jaio zan. Handik aurrera, aliantza sendotu dogu". Zelako uria nahi dan jakiteko, aurrera begirako prospekzinoak egin behar dira. Postigok esan deusku ez dala zeregin erreza. Esan dogunez, Imanol Pradales buru zala egin eben atzo urteurren ekitaldia Euskalduna Jauregian. Lehendakariak esan eban Bilbo metropolitanoak Atlantiar Ardatzeko erreferentzia izan behar dauala. Norabide horretan lan egin beharko dabe: "Eusko Jaurlaritzaren proiektuagaz bat gatoz. 2050erako Bilbo metropolitanoa hub estrategikoa izatea espero dogu Aliantza Atlantikoan". Azkenik, 2050ari begira, ardatz edo ildo nagusiak zeintzuk izango diran azaldu deusku Postigok: "Ideia nagusi bi dagoz. Batetik, lehen aitatutako hub estrategikoa izatearena. Bestetik, eta horretarako, itsasadarra aukera nagusia izan behar da".

LIN3S aholkularitzak ToBeInB2B analisia aurkeztu dau Bilbon. Azterketa egiteko B2B, business-to-business, enpresetako 200 profesionalek hartu dabe parte, 20 sektore desbardinetakoak. Egindako ikerketaren arabera, adimen artifiziala tresna operatiboa da dagoeneko holako enpresetan, Itziar Adarraga LIN3S aholkularitzako zuzendariordeak esan deuskunez. Dana dala, ToBeInB2B txostenaren arabera, enpresen %5ak bakarrik integratu dau dagoeneko adimen artifiziala bere modelo operatiboan. Beraz, joerea goranzkoa da, baina hazten jarraitzeko tarte handia dago oindino.

Nazinoarteko gaietan sakondu dogu gaur Bizkaia Irratian, kezka handia dago orokorrean eta. Iran eta Ekialde Hurbilera begiratu dogu batez be eta argibideak emoteko geugaz euki dogu beste behin Txente Rekondo, nazinoarteko gaietako aditua. Iran eta Ameriketako Estatu Batuen arteko bakerik ez dago momentuz. Aspaldion ez da aldaketa handirik egon: "Momentu honetan, ez dago ez gudarik ez bakerik. Ika-mika puntualak dagoz, Ameriketako Estatu Batuek eta Israelek adierazpen bortitzak egin bitartean. Edozelan be, Iran ez dago bere uranio aberastuaren erreserbak inori emoteko prest". Hori dala eta, Rekondok esan deusku, bere ustez, Ameriketako Estatu Batuek dabela bake-akordiorako premina handiagoa. Ormuzeko blokeoa amaitzea eta programa nuklearra, biak dagoz jopuntuan bake negoziazinoetan eta biak dira gai korapilatsuak. Konponbideari jagokonez, betiko moduan, diplomaziaren alde agertu da Rekondo: "Diplomaziari atea ireki behar jako. Horren harira, bide diplomatikotik datozan proposamenak indartu behar dira". Ganera, Israelen sorrera jo dau zonaldean dagoan ezegonkortasunaren arrazoitzat. Ukrainari jagokonez, hiru eguneko su-etena adostu baeben be, alde biek alkarri leporatu deutse urratzea. Hau klasikoa da: "Garaipenaren Egunean emondako diskurtsoan, Putinek argi esan eutson Washingtoni alkarrizketarako prest dagoala, baina indar posizino batetik, noski". Trumpen asmoa Ukrainako gerrea ahalik eta arinen amaitzea izan arren, asko luzatu jako hau be. Kontuak kontu, azken egunotan ezagutu dogu Trumpek Txinara osterea egingo dauala asteon, maiatzaren 13tik 15era. Rekondok uste dau goi-bilera interesgarria izango dala.

Bizkaiko Txakolina Jatorri Deiturak Txin Txin Fest jaialdiaren bigarren edizinoa ospatuko dau, maiatzaren 16an eta 17an, Bilboko Areatzan. Lehen edizinoaren arrakastaren ondoren, jaialdia hitzordu nabarmen gisa finkatu da egutegian, txakolina lurraldearen, kulturaren eta bizimoduaren adierazpen gisa indartzeko, Maider Zalduondo Bizkaiko Txakolineko komunikazino arduradunak esan deuskunez. Bi egunez, Areatzan 20 upategi, 60 txakolin erreferentzia baino gehiago, dastaketak, gastronomia eta kultur programazinoa bilduko dituan jaialdia egingo da uriaren erdigunean. Ganera, unerik nabarmenetako bat maiatzaren 16an izango da, zapatuz, 12:00etan, uzta barriaren aurkezpenagaz, Davide Dall'Amico Bilboko Mina jatetxeko sommelierrak gidatuta. Hain zuzen be, testuinguru horretan dago mezularien figura. Enbaxadore horreek Jatorri Deituraren balioak sinbolizatzen dabez eta euren dimentsino kultura indartzen dabe, Bizkaiaren nortasuna kulturaren eta gastronomiaren bidez proiektatzen laguntzen daben pertsonak edo erakundeak aintzatetsiz. Zalduondok aurreratu deuskunez, aurtengo mezularia Fariba Sheikhan aktore gernikarra izango da.

Bihar estreinauko dabe Ondarroan Jon Maia Soriak egindako Berriz etorriko zera dokumentala, frankismoan bertara bizi izaten joandakoen inguruan. Ondarroako Udalak egin eutsan proposamena eta urte pare bat egin ditu lanean. Orduan Ondarroa bizilekutzat hartu ebenekin berbetan egon da, eta besteak beste, ikusi dau Ondarroan Ayamonteko jente piloa bizi dala eta alderantziz, ondarrutar ugari Ayamonten.  Berriz etorriko zera dokumentalaren estreinaldia bihar iluntzeko 20:00retan izango da Ondarroako herriko frontoian.

300.000 zergadunek aurkeztu dabe errenta-aitorpena dagoeneko Bizkaian. Itxaso Berrojalbiz Ogasun eta Finantza diputaduak errenta aitorpenaren kanpainaren azken nobedadeak plazaratu deuskuz gaur Bizkaia Irratiko mikrofonoetan: "Goizeko azken datuak atera doguz hona etorteko. 300.000 aurkezpen egin dira dagoeneko. Zenbateko oso handia da, pasa dan urtean baino 60.000 gehiago". Pertsona banatuen kasuan aldaketaren bat egon da antza, eta orain ezarritako ereduak kalte egiten deutse, ezin dabelako errenta aitorpena seme-alabekaz egin. EH Bilduk arau hori aldatzeko eskaria egin dau, baina Berrojalbizek hartutako neurria defendatu dau: "Pertsona bakotxak alkartzeko aukeratzen dauan moduak ezin dau ondoriorik euki errenta aitorpenean". Iruzur fiskalari jagokonez, igazko urtean 469 milioi erregularizau ziran egindako jarduketen ondorioz: "Gero eta tresna gehiago daukaguz iruzur fiskala kontroletako. Kontrola mantenduz eta handituz goaz". Halanda be, iruzur fiskala presente dago oindino eta datuak ez dira asko aldatzen urte batetik bestera. Bestalde, entzuten dogunez, gurasoen seme-alabenganako dohaintzak handitu egin dira, batez be, etxea erosten laguntzeko. Etxebizitzen prezio altuaren ondorio ei da hau. Aldundian be igarri dabe: "Etxebizitza bat erosterakoan, bankuek ez dabe %20 bat finantzetan. Batzuetan, familiak dirua emoten deutso gazteari. Orain arte, zerga hori ordaintzen zan, baina orain salbuetsi egin dogu 30.000 eurotik aurrera". Amaitzeko, BATUZ estrategiaren ganean be egin dau berba diputaduak: "Aurtengo urtarriletik martxan da BATUZ. 88.000 zergadunetik 74.000 badagoz martxan. Beraz, ondo goaz". Ganera, TicketBAI programaren erabilerean be sakondu dau Berrojalbizek. Izan be, gogoratuko dogu polemikea egon zala erabilerea dala eta, txosnekaz tartean.

87 urte eukazala hil zan astelehenean Carlos Garaikoetxea lehendakaria. Hori dala eta, bere figura gogoratu gura izan dogu Bizkaia Irratiko Goizeko Izarretan irratsaioan gaur. Horretarako, Elixabete Garmendia bere biografoagaz egin dogu berba. Izan be, Carlos Garaikoetxea. Lider bat Lehendakari biografia argitaratu eban 2018an kazetari gipuzkoarrak. Esan deuskunez, biografia idazteko enkargua jaso eban: "Martxelo Otamendik egindako eskaera izan zan". Horretarako, behin baino gehiagotan bildu ziran Garmendia, Otamendi eta Garaikoetxea bera. Garaikoetxearen izaerari jagokonez, pertsona elegantetzat jo dau Garmendiak lehendakaria: "Ondo hezitako pertsona elegantea zan Carlos Garaikoetxea". Dana dala, Garmendiak esan deuskunez, jenio txarra be erakusten eban noizean behin. 1980tik 1985era izan zan Garaikoetxea lehendakari. Hori dala eta, gatxa da biografoarentzat bere agintaldiko momentu bakar bat nabarmentzea. Halanda be, Euskadiko erakunde batzuen sorreran jokatutako papera azpimarratu deusku.