Jokoan

Euskotren Ligan lehiatzen diran zortzi traineruetatik bat bera be ez da Bizkaikoa. Halandabe, badira Bizkaiko arraunlari batzuk emakumezkoen gorengo mailako traineruetan. Arraun Lagunak, aurreko denporaldian ligea eta Kontxa irabazi ebazan traineruan, ondarrutar bi, Mar Larrea eta Nagore Osoro patroia, lekeitiar bat, Jule Arkotxa eta elantxobetar bat, Zuberoa Egurrola dabilz arraunean. Zuberoa Deustuko traineruan hasi zan eta bertan lau denporaldi egin ostean, Hondarribiara joan zan Euskotren Ligan lehiatzera. Urtebetez ibili zan Ama Guadalupekoan eta handik Donostiara joan zan, Arraun Lagunak taldera. Aurten bigarren denporaldia betetzen dabil Juan Mar Etxaberen aginduetara eta igaz lez Euskotren Ligako trainerurik indartsuena dala erakusten dabil Lugañene ontzia. Zuberoa Egurrolagaz egin dogu berba Jokoan kirol tartean. Gustora dago Arraun Lagunaken baina beharrean segiduten dau Elantxobeko arraun taldean urte gitxira emakumezkoen trainerua atarateko asmoagaz.

Ez zan ezustekorik egon Eusko Label Ligako lehen jardunaldian, eta Oriok, faborito nagusiak, nagusitasunez irabazi eutsen aurkariei Madrilgo Riosequilloko urtegian jokatutako erlojupeko estropadan. Traineru horia arerioak baino azkarrago ibili zan, eta ia zortzi segundoko aldea lortu eban Zierbena eta Donostiarrarekiko. Bermeo-Urdaibaik laugarren postuarekin konformatu behar izan eban, hamar segunduko zigorra jasota ganera. Sailkapeneko azken bi postuak saihesteko borrokan, Galiziako ordezkari biak, Chapela eta Ares, izan ziran kaltetuenak. Isuntza ondo hasi zan baina hamargarren geratu zan azken sailkapenean, Santurtziren atzetik; Ondarroa, zortzigarren geratu zan, zazpigarren postutik ehunen batzuetara. Eusko Label Ligako lehen estropadan gertatutakoa aztertu dogu Jokoan kirol tartean Iurgi Gorostiza, Isuntzako arraunlaria, Iñaki Goikoetxea, Bermeo-Urdaibaiko arraunlaria eta Josu Elu, Ondarroako zuzendaritza batzordeko kidea eta arraunlari ohiagaz.

Emakumezkoen Traineru Elkarteak antolatzen dauen ligako lehen estropadak jokatuko dira datorren astegoienean. Zapatuan erlojupekoa jokatuko da Astilleroko errekan eta domekan Pasaiako eremuan jokatuko da bigarren jardunaldiko estropadea. Bizkaiko bost traineru lehiatuko dira aurten emakumezkoen bigarren mailan: Kaiku, Deusto, Ondarroa, Isuntza eta Portugalete. Bizkaia Irratiko Jokoan kirol tartean bost traineruetako ordezkariekaz egin dogu berba. Iker Cortes Ondarroako entrenatzailea, Ainhoa Escobal Kaikuko arraunlaria, Peter Zendoia Isuntzako entrenatzailea, eta Leire Belasko Portugaleteko arraunlariaren eretxiak entzun doguz. Orain arte egindako estropaden ganeko balorazinoa eskatu deutsogu eta denporaldirako ipini dituen helburuak be kontatu deuskuez.

Espainiako txapelketak jokatu dira astegoien honetan Galiziako uretan, Meiran, Moañan. Gizonezkoetan Oriorentzat izan da garaipena; bigarren Donostiarra sailkatu da, 12 segundora; hirugarren Zierbena, 18ra; eta laugarren Cabo, 56 segundora. Emakumezkoetan, Arraun Lagunak izan da irabazle, 10 minutu eta 51 segundoko denborarekin. Bigarren Astillero izan da, bederatzi segundora; hirugarren Perillo; eta laugarren Tiran, azken biak 30 segundora. Ez da Bizkaiko ordezkaririk egon emakumezkoen estropadan, baina bai Bizkaiko ordezkaritzea Arraun Lagunak-en tostetan: Jule Arkotxa lekeitiarra, Zuberoa Egurrola elantxobetarra eta Mar Larrea ondarrutarra. Jule Arkotxagaz egin dogu berba Jokoan kirol tartean. Lekeitiarrak esan deusku taldearen helburua estropada guztiak irabaztea dala eta oso gatxa dala irabazteko gogoa kentzea. “Azkenean dopamina puntu bat da eta entrenatzera zoazenean be esaten dozu: ostra irabazi egin gura dot”. Aurten nagusi izan dira Gipuzkoa, Euskadi eta Espainiako txapelketetan.

Xabi Barandika zuriz jantziko da barriro be, bost hilabeteko errekuperazino prozesua atzean itxi ostean. Aurrelari gernikarrari ebakuntzea egin behar izan eutsoen ukondoan, bertan jasotako pelotakada batek eragindako kalteak osatzeko. Barandikagaz egin dogu berba Bizkaia Irratiko Jokoan kirol tartean eta esan deusku irrikaz dagoala barriro jokatzen hasteko, oso gogorra izan dan errekuperazino prozesua gainditu ostean. Barandikak Jon Zabalagaz batera jokatuko dau Mungiako torneoan. Lehenengo partidua eguena honetan jokatuko dabe Goixerri eta Lekerikak osatutako bikotearen aurka. Domekan beste partidu bati aurre egingo deutso. Jon Ibarluzea atzelari dauela, Aritz Erkiaga eta Atainen aurka jokatuko dau Markinako unibersidadean.

Jon Uriarte Athletic Clubeko presidenteak eta Mikel Gonzalez Futbol Zuzendari Nagusiak lehenengo talde bien denporaldiaren balantzea egin dabe San Mamesen emondako prentsaurreko luze batean. Presidenteak ez dau inolako zalantzarik izan denporaldia "etsigarritzat" joteko, batez be ligan egindako ibilbide eskasean oinarrituta; izan be, taldeak hamabigarren postuan amaitu eban. «Banakako zein talde mailako autoexijentzia handiagoa behar dogu», adierazo dau Uriartek. Ernesto Valverderen lau urteko etaparen ostean hartutako lehenengo neurri nagusiak Edin Terzic dauka izena. «Asko sinesten dau Athletic honetan», esan dau presidenteak, eta Mikel Gonzalezek lidergorako daukan gaitasuna nabarmendu dau. Uriartek gogorarazo dau taldeak ez dauala lortu denporaldi hasieran jarritako helburua. «Inertzia irabazlearen galera eta frustrazino sentsazinoa» aitatu dauz, «taldeak ezin izan ebalako joko ona berreskuratu ezta emaitza onak kateatu be». Halanda be, Txapeldunen Ligan Valverderen taldea «lehiakorra izan zan azken minutura arte multzo gogor baten, finalista biak aurrean zituala». Lehiakortasun hori Kopan be ikusi zan neurri baten, finalerdietara helduta, baina Superkopan guztiz faltan bota zan. Emaitzak onak izan ez arren, presidenteak azpimarratu dau konfiantza osoa mantendu dala Ernesto Valverderengan, bere «gaitasuna, energia, motibazinoa eta lantaldearen ezagutza sakona» dirala eta; baita teknikariaren eta jokalarien arteko batasuna be, Gasteizen lortutako garaipenean ikusi zan moduan. Kirol zuzendaritzak eta entrenatzaile barriak hainbat zuzenketa adostu dabez datorren denporaldiari begira. Lidergo barriak egongo dira, Edin Terzic buru dala, eta maila teknikoko hainbat aditu be sartuko dira, baita errendimendu saila eta zerbitzu medikoak indartzeko neurriak be. Entrenatzaile alemaniarraren bertuteak nabarmendu dabez Uriartek eta Gonzalezek, eta azpimarratu dabe zelan aukeratu dauen Athletic beste txapelketa handietako klub ospetsuen eskaintzen gainetik. «Lidergorako gaitasun handia dauka. Energia eta indarra transmititzen ditu. Zorrotza da eta lanerako gaitasun handikoa». Espero dan joko-estiloari buruz be berba egin eben: «Bere taldeek erritmo handia eta bertikaltasuna daukie. Bere joko-moduak bat egiten dau San Mamesen gustuko dan futbolagaz. Uste dogu daukagun plantillari etekinik handiena aterateko egokiena dala». Emakumezkoen taldea Emakumezkoen lehenengo taldeari jagokonez, Jon Uriartek adierazo dau denporaldia «etsigarria» izan dala, taldeak erakutsitako maila plantilearen benetako ahalmenaren azpitik egon dala uste dauelako. Presidentearen esanetan, taldeak geldialdi txiki bat edo atzerapauso bat izan dau errendimenduan, «aurreko urteetako bilakaera positiboari eutsi ezinik, nahiz eta oso lantalde gaztea izan». Uriartek azpimarratu dau Athletic Clubek barriro be goiko postuetan lehiatzeko bidea berreskuratu behar dauela, eta bereziki deitoratu dau Nerea Nevadok eta Maite Zubietak taldea itxi izana. Horren harira, Klubak berezko talentua prestatu, erakarri eta garatzeko egiten dauen ahalegin handia nabarmendu dau.

Euskal Herriko traineru txapelketak ez dau emaitza onik ekarri Bizkaiko ontzientzako. Izan be, gizonezkoetan zein emakumezkoetan lehiatutako zortzi ontziak sailkapeneko azken postuetan geratu dira. Bermeo-Urdaibai, Bizkaiko txapelketako irabazleak hirugarren postuan amaitu eban bigarren txandan, Orio eta Donostiarraren atzetik. Ganera, lehen txandako Hondarribiak, Getariak eta Zierbenak hobetu egin eben Bou Bizkaiaren denporea. Jon Salsamendi, Bermeo-Urdaibaiko entrenatzaileagaz egin dogu berba Jokoan kirol tartean. Berak autortu dau, oso egun gogorra izan zala domekakoa eurentzako. “Goizerik okertu jaku eguna. Laugarren kalea tokau jakun zozketan eta itsasoa egoan moduan egonda estropada eremuko alderik txarrena zan, zalantzarik gabe”. Salsamendik mezu positiboa bialdu deutse Urdaibai zaleei. “Ez emon garrantzirik Euskadiko txapelketako emaitzeari. Lanean jarraituko dogu Bou Bizkaiarik onena lehiatzeko Eusko Label Ligan”.

Bou Bizkaia nagusitu zan Bizkaiko traineruen txapelketan, Isuntza eta Zierbenaren aurretik. Laugarren postua Santurtziko ontziarentzat izan zan, eta lau traineru honeek hartuko dabe parte datorren domekan Getariako uretan jokatuko dan Euskadiko Txapelketan. Urdax Antepara Urdaibaiko arraunlariagaz egin dogu berba Jokoan kirol tartean. Arraunlari  bilbotarra pozik agertu da Lekeition egindako estropadeagaz. “Lortutako emaitza onak dinosku bide onetik ari garala lanean”. Zierbena, igaz Mundakan jokatutako edizinoan Bizkaiko txapeldun izan zana, eta Urdaibai ziran faborito nagusiak Lekeitioko estropadea irabazteko. Asier Zurinagak zuzendutako traineruak lehen postuan egin eban lehen ziaboga, Isuntza eta Zierbenaren aurretik, biak segundu bira. Itzulerako luzean, Bermeok lehen postua galdu eban Zierbenaren mesedetan; galipoen taldeak lau segundo berreskuratu eutsozan bere areriorik zuzenenari. Etxeko taldeak hiru segundo galdu ebazan, baina banderaren lehian jarraitu eban. Estropadaren erdira hiru ontzi hiru segundoren barruan helduta, lehia guztiz zabalik egoan eta oso gatxa zan probaren azken emaitzea aurreratzea. Halandabe, zalantza guztiak hirugarren luzean argitu ziran. Izan be, Bermeok beste martxa bat sartu eta estropadea ia erabakita itxi eban. Bou Bizkaiak 10 segundo kendu eutsozan Zierbenari eta 12 Isuntzari. Jon Salsamendik zuzendutako taldearen aldea nabarmen hazi zan azken luzean, eta helmugan 23 segundotik gorakoa izan zan. Hirugarren eta azken ziaboga egin ostean, Asier Zurinagak estriborrerantz eroan eban bere ontzia, ipar-mendebaldeko hondoko itsasoak eragindako olatuen indarra ahalik eta gehien aprobetxetako. Emakumezkoen mailan, Kaikuk goitik behera kontrolatu eban estropadea, Deusto eta Ondarroaren aurretik. Bizkaitarra ontziak atzean itxi ebazan aurkariak lehenengo luzean eta bigarrengoan nahikoa izan eban aldea ondo kudeatzeagaz txapela eskuratzeko.  

Astegoien honetan hainbat jarduera eta ekimen izango dira Bermeon, Arrain Azoka dala eta. Urtero lez, kirola ez da faltako eta esku-pelota partiduaz aparte, zesta-punta be protagonista izango da. Itsasoko sareetatik frontoiko sareetara lelopean, Tuna Jai Alai Cup txapelketa jokatuko da domekan. Arrantza kulturagaz eta bereziki Bermeoko Arrain Azokagaz lotura estua daukan txapelketa da, eta horregaitik Bermeoko enpresek protagonismoa izango dabe frontoian. Ez ohikoa dan kiniela modalidadean jokatuko dabe bost bikotek, eta bikote bakotxa Bermeoko enpresa baten ordezkari izango da, hau da, bikoteek enpresen izena eroango dabe. Hormaetxeak eta Salegik Arroyabe, Aaron eta Elkorok Alakrana, Astelarrak eta Bereauk Cusumano, Javierrek eta Peruk Serrats, eta Cosmek eta Urangak Royo enpresa ordezkatuko dabe. Hori 12:40ean hasiko dan final handiari jagokonez, baina jaialdia 12:00etan hasiko da Bermeo eta Noain herrietako pelota eskolen arteko partiduagaz. Bermeoko Iruskietak eta Ontoriak Noaingo Palacios eta Alzateren kontra jokatuko dabe.

Pelotari guztien zorigaiztoa eskuko mina izaten da. Denboraldian zehar pelotariek eskuetatik asko sufritzen dabe, eta askotan, partidu batzuetan deskantsua hartu behar izaten dabe eskuetako mina sendatzeko. Gaitz honen aurrean, Mikel Estrada Unamunzagak Masterreko lana burutu eban. Amaierako lana esku pilotako takoen inguruan egin eban. Bere helburua, tako barri batzuk sortzea zan, pelotariek ahalik eta gutxien sufritzeko eskuetatik, eta posible bazan, minik ez sufritzeko.  Lana hain ona izan zan, beste enpresa eta pertsona batzuen laguntzeagaz, Mikel Estradaren takoek profesionaletara egin ebela salto. Kasurik ezagunena Dariorena izan da. Gaur egun Banakako txapelketako finalerdietan dagoan pelotaria izan zan lehenengotarikoa tako berezi honeek erabiltzen. Emaitza oso ona izan zan eta pelota munduan zabaltzen hasi zan Estradaren lana. Trinketean be erabiltzen dira, baina aurrerapausua amateurretan eta gaztetxoenetan emon zan. Pelota munduan lehen pausuak emoten dabezan gazteek gehiago disfrutatzen dabe tako berezi honekaz. Mikel Estradak pelotari bakoitzari pertsonalizatzen deutsoz takoak, eta oraindik materiala eta sistema hobetzeko pausuak emoten dabil. Geugaz izandako solasaldian, udarako albiste barriak egongo dirala aitortu deusku. Entzun elkarrizketa osorik.

Bermeoko Ziklistek eta Castejoneko “El Patorrillo” peñak egun biko erronka solidarioa egingo dabe. Maiatzaren 9an eta 10ean, “Bizitzaren alde” elkartasun erronkea hain zuzen be. Bermeoko Ziklistek taldeak, Castejoneko “El Patorrillo” Txirrindulari Peñegaz batera, 450 kilometroko joan-etorria egingo dabe zapatuan eta domekan. Minbiziaren Aurkako ekimen honetan batutako dirua gaixotasunaren aurkako borrokara bideratuko dira. Horregaz batera, herritarrei parte hartzeko hainbat bide eskaini deutse, elkartasunaren sarean bakotxak bere ekarpena egiteko aukera zabalduz. Erronkak bere une beroena domekan eukiko dau, Bermeon antolatutako harrera eta egitarau bereziagaz. 13:00etatik aurrera, Dantzaz Blaik, Kanta kanta loruek, Bermeoko Abesbatzak eta umeentzako Kirik girotuko dabe Lamera. 15:00etatik aurrera, barriz, Apokhalipsis, Addar eta Tximino taldeen kontzertuen txandea izango da. Egun osoan zehar girotutako jardueren ondoren, txirrindulariak 16:00ak eta 16:30ak bitartean helduko dira Lamerara.

Futbolean, kopa txapelketak beti izan dira bereziak eta talde askoren lorpenik handienak txapelketa honetan lortu dira. Azken urteetan, formatu barriagaz, talde apalek edo aurrekontu urriagoa daukenek zeresan handia emon dabe. Azkena, eta historia egiten dabilena, Portugalgo Torreense taldea da. Portugalgo bigarren mailako taldea da eta maiatzaren 24an Taça de Portugal-eko (Portugalgo kopa) finala jokatuko dabe Sporting Portugalen kontra, Athletic txapeldunen ligatik at itzi eban taldearen kontra. Portugalgo talde honetan Unai Perez ondarrutarrak jokatzen dau. Athletic-eko harrobian, Logroñesen eta Barakaldon jokatu ostean, Portugalgo bidea hartu eban. 24 urtegaz, futbol profesionalera salto egitea erabaki eban. Liga txapelketan hirugarren dagoz eta kopan historia egiten dabiz. Bidean, lehen mailako Casa Piari be irabazi deutse. Final erdietan hirugarren mailako Fafe talderen kontra irabazi eben partidu bira, talde honek lehen mailako hiru talde kanporatu ebazan final erdietara sailkatzeko. Gaurkoan, Unai Perez geugaz izan da Jokoan irratsaioan.

Unai Laso eta Jon Ander Albisu izango dira Altuna eta Ezkurdiaren aurkariak Binakako Txapelketa Nagusiko finalean. Baikoko bikoteak 22-21 irabazi eutsan domekan Elordi eta Zabaleta bikoateri, urte askoan gogoratuko dan finalerdi handi batean. Adarraga frontoia eszenatoki ezin hobea izan zan momentuz txapelketako partidu onena jokatzeko. Danetarik izan eban partiduak: pelotarien maila oso altua, markagailua irauli eben garaileek eta polemikea. Polemikea izan zan protagonista partiduaren azken txanpan. Guzti hori Pelota Tertulian jorratu dogu, Jokoan irratsaioan, Cesar Ortuzarren (deiako kazetaria), Ramon Basalduaren eta Beñat Igarzaren eskutik.

Unibertsitateko lan bat moduan hasi zana, bere hamargarren edizinoan euskadiko txapelketaren parte izango da. Labur esanda, baina hori da Kolazino Mendi Egunak lortu dabena. Jokin Zabala, lasterketaren zuzendaria eta gaurkoan gurekin Jokoan irratsaioan izan danak unibertsitateko lan bat moduan hasi eban ekitaldi hau. Orduko IVEF ikasten ebilen eta menditik korrika egitea gustuko eukan. Osagai bi honek batuz gero, unibertsitateko lan bat Bedian antolatutako mendi lasterketa baten oinarritu eban. Lana hain izan zan ona eta borobila, 20 urte eukazala Jokin Zabalak teoria hori praktikan jarri ebala. Covid-19aren ondorioz urte bitan ezin izan eben Kolazino antolatu, baina gainointzeko urteetan bai. Aurtongoa hamargarren edizinoa da, eta lehenengo aldiz Euskadiko Mendi Txapelketaren parte izango da. Bedian egiten dan urteko ekitaldirik handienetakoa da, askoren etxeetan, Kolazino Mendi Egunak Bedia mapan jarri dau. 4 Ibilibide izango dira: 13 Kilometrokoa kadete eta juniorrentzako 17 kilometrokoa (1.002m+) adin guztientzako 24 kilometrokoa (1.511m+) Euskadiko Txapelketako lasterketa 16 kilometroko mendi martxa (900m+) publiko guztiarentzako 24 kilometroko lasterketearen ibilbidea Hona hemen 2023ko Kolazino Egunaren Bideoklipa: Kolazino 2023

Martiaren 14, zapatuan, jokatuko da Bilboko Artxandako Kiroldegiko igerilekuan Euskadiko Indoor Apnea Txapelketea. Open kategoriak Euskal Autonomia Erkidegoko eta beste bost autonomia erkidegotako 23 kirolari bilduko dauz. Besteak beste, bertan izango dira Gari Iruretagoiena eta Eider Gutierrez, apnea estatikoko egungo Espainiako txapelduna eta txapeldunordea, hurrenez hurren. Parte-hartzaileak maila handia erakutsiak dira aurrekoetan, izan be, hainbat apneistak 8 minututik gorako markak daukez apnea estatikoan, eta 200 metrotik gorakoak apnea estatikoan, eta 200 metrotik gorakoak apnea dinamikoan. Aurtongo edizinoa bederatzigarrena izango da 2007az geroztik, eta Bilbon egiten dan lehenengoa. Jokoan irratsaioan Eider Gutierrezegaz egon gara, bost biderrez jarraian euskadiko txapelduna izan da eta zapatuan seigarrena jarraian lortu gura dau.          

Euskal Herriko ardi moztaileen eta artilarien selekzinoak mugarri historiko berriak ezarri dauz Mastertonen, Zeelanda Berrian, ospatu dan Golden Shears and Woolhandling Munduko Txapelketan. Alde batetik, Euskal Herriko selekzinoa lehen aldiz lehiatu da mundu mailako txapelketarik handienean eta, beste alde batetik, Munduko Kontseiluko kide barria izango da aurreratzean. Euskal Herriko selekzinoa munduko moztailerik eta artilaririk onenegaz batera ibili da lehian. Nazinoarteko lehiaketa handienean parte hartzea “sekulakoa” izan da, esperientzia “ahaztezina”. “Izugarria maila, exijentzia, giroa, harremana, lehia eta entrenamenduak. Beste herrialdeetako moztaileegaz eta artilariegaz izandako elkarrizketak, trukeak eta bizitako uneak. Euskal Herriak nazinoarteko eszenatoki handienean egotea merezi dabela erakutsi dogu. Asebeteta sentitzen gara, nahiz eta helburu berriei heltzeko irrikaz egon”, adierazi dabe selekzinotik. Ardi moztaile modernoaren sorlekutzat jotzen dan herrialdean egindako egonaldian, taldeak, motxila bete irakaspen eta esperientzia ekarri dauz Euskal Herrira. Ardi mota eta erritmo berriak, teknika eta kultura desberdinak. Egun bakoitza erronka fisiko eta mentala izan dira, baina etengabeko ikasgaia. Nazinoarteko erreferenteegaz sektoreaz berba egin dabe, estiloak kontrastatu dabez, xehetasunak zuzendu eta etorkizunerako bide barriak zabaldu. Ikasitako eta bizitako guztia kontatzeko, Ipar Arrinda, Euskal Herriko ardi moztailea izan dogu geugaz jokoan irratsaioan.  

Gontzal Galan: "Ez dot uste Ernesto Valverde datorren denboraldiko AThleticen entrenatzailea izango danik"

Jokin Altuna eta Joseba Ezkurdia dira Binakako Txapelketako lehen bikote finalista. Domekan Ogeta frontoian Laso eta Albisuri irabazi eutsien, txapelketako bikote onenari eta faboritoei. Altuna eta Ezkurdiak osatutako bikotea txapelketako momenturik onenean da, azken sei partiduak jarraian irabazita. Laso eta Albisu, aldiz, txapelketako momenturik garrantzitsuenean beherakadea emon dabe. Halan da be, bikote honek datorren astegoienean hil ala biziko partidua izango dabe Elordi eta Zabaletaren kontra. Irabazten daben bikoteak, Altuna eta Ezkurdiaren kontra jokatuko dabe finala datorren hilaren 29an. Imanol Magro (Berria), Cesar Ortuzar (Deia), Ramon Basaldua eta Beñat Igarza izan dira gaurko tertuliako protagonistak.

Denporaldiko partidurik garrantzitsuena jokatuko dau Athleticek eguazten honetan Realaren aurka Anoetan. Kopa txapelketako finalerako sailkapena dago jokoan. Talde gipuzkoarra da faboritoa, joaneko partiduan 0-1 irabazi ebalako eta zaleriaren babesa eukiko dauelako. Halandabe, Ernesto Valverderen gizonak ezustekoa emoten ahaleginduko dira. Egia esateko, zuri-gorrien gol bakar batek bardindu egingo leuke kanporaketea. Hori bai, Athleticek aurreko partiduetan baino maila hobea emon beharko da Anoetan finalerako sailkatzeko aukerak izateko. Unai Gomez Etxebarria, Athleticeko jokalariagaz egin dogu berba Lezaman. Gogotsu eta ilusinoz beterik dagozala esan deusku erdilari bermeotarrak. Taldea indartsu dagoala dino eta badaki konzentraturik eta intensidade handiagaz jokatu behar dauela lehen minututik. Realaren estadioan eguaztenean aurkituko daben giro gogorrak ez deutso ikararik emoten, motibazinoa indartu baino. Dana emotera urtengo dabe lehen minututik, baina zoratu barik, partidua luzea izango da-eta. Ernesto Valverdek hogeta bederatzi partidutan zelairatu dau aurten Unai Gomez. Hamaikatan hasieratik urten dau eta aulkitik ganerakoetan. Erasoko lau postuetan jokatu dau bermeotarrak, eskoitik, ezkerretik, aurrelariaren atzetik eta aurraldean. Bere betiko postuan jokatu gurako leuke -euskarrian- baina pozik dago zelaiko edozein postutan jokatuta. Atzealdeko ezker hegalean aritzeko prest be agertu da. Garbi dago, Unai Gomezek gorputz eta arima ipinten dauzela zelaira urteten dauen bakotxean, talde jokoaren alde egiteko.

Athleticen tertulia: "Erreala gainbaloratua dau Athleticen kontra ondo jokatu ebalako"