Podcast de Corcovadomusica

Edición número 1455 de O Recanto do Corcovado. Puidestes escoitala o venres 13 de xuño a través de RKV Radio Vigo, e o sábado 14 na sintonía de Cuac FM A Coruña, Rádio Filispim e da Radio Municipal de Redondela. Pechamos a rolda de emisións o mércores 18 a través de Radio Crónica Folk Musical. Esta semana saímos de ruta lusófona por Portugal e Brasil, fundamentalmente. Estréovos“Inspirar”, o novo disco dunha das bandas máis lonxevas do panorama musical portugués, os Danças Ocultas. Entra tamén, dende Portugal, o novo sinxelo de Lina e Jules Maxwell, ademais da música de Rodrigo Leão. Dende Brasil escoitamos dúas propostas diferenciadas no plano estético, mais ben asentadas na tradición postropicalista: Gabriel da Rosa e Tagua Tagua. Completamos o programa con “Bring Summer”, primeiro sinxelo do novo disco dos Me and My Friends. Na súa música fusionan afrobeat, funk e groove con matices tropicalistas.

Edición número 1454 de O Recanto do Corcovado. Puidestes escoitala o venres 6 de xuño a través de RKV Radio Vigo, e o sábado 7 na sintonía de Cuac FM A Coruña, Rádio Filispim e da Radio Municipal de Redondela. Pechamos a rolda de emisións o mércores 11 a través de Radio Crónica Folk Musical. Comezamos botándolle un ollo ás últimas entregas discográficas de Real World, atendendo tanto á discográfica matriz (responsables do novo proxecto dos Rizwan-Muazzam Qawwali ) como ao subselo X (a través do cal veñen de editar os novos EP’s de Eliza Marshall e do dúo Siraba). Na segunda parte do programa visitamos Malawi para escoitar o novo traballo da Madalitso Band, para a seguir gozar co novo da banda congolesa Kin'Gongolo Kiniata. Rematamos o programa coas resonancias ethiojazzísticas dos Ukandanz.

Edición número 1453 de O Recanto do Corcovado. Puidestes escoitala o venres 30 de maio a través de RKV Radio Vigo, e o sábado 31 na sintonía de Cuac FM A Coruña, Rádio Filispim e da Radio Municipal de Redondela. Pechamos a rolda de emisións o mércores 4 a través de Radio Crónica Folk Musical. Noa Lur leva algunhas semanas a presentar “Multipolar”, o seu último disco. É un traballo multirreferencial tanto a nivel musical coma ontolóxico. Dámos nel con elementos marcadamente soul, alén dos puramente jazzísticos, mais tamén con ecos de rock progresivo, jazz eléctrico e mesmo pop de vangarda. Escoitamos tamén “Music for Roads”, o novo disco do dúo finlandés Tuomo & Markus. Gravárono coa complicidade Verneri Pohjola á trompeta, e mesmo botaron man do talento de Marc Ribot para rexistrar unha peza. Completaremos o programa coas últimas pezas para Agogo Records de Mo’Horizons e Krajenski, antes de pechar o programa co excepcional novo disco da banda sueca Cosmic Ear.

Edición número 1452 de O Recanto do Corcovado. Puidestes escoitala o venres 23 de maio a través de RKV Radio Vigo, e o sábado 24 na sintonía de Cuac FM A Coruña, Rádio Filispim e da Radio Municipal de Redondela. Pechamos a rolda de emisións o mércores 28 a través de Radio Crónica Folk Musical. Adicamos o programa na súa totalidade á edición número XII dos Premios Martín Códax da Música Galega, Escoitames temas de parte dos proxectos que aspiran a se facer con algún dos premios. É o caso de Crúas, Faia, Carmela, A Pedreira, De Ninghures, Valentín Caamaño, Baldo Martínez e a Orquestra Galega de Liberación. Abrimos o programa coa música de Leilía, que van recoller o premio honorífico pola súa traxectoria.

Edición número 1451 de O Recanto do Corcovado. Puidestes escoitala o venres 16 de maio a través de RKV Radio Vigo, e o sábado 17 na sintonía de Cuac FM A Coruña, Rádio Filispim e da Radio Municipal de Redondela. Pechamos a rolda de emisións o mércores 21 a través de Radio Crónica Folk Musical. No programa desta semana non saímos da península ibérica: a nosa escolma lévanos por terras asturianas, cántabras, galegas e portuguesas. Abrimos o programa co primeiro EP dos Galgo para, a seguir, descubrir as novas cancións do dúo Casapalma. Logo disto, e ben acomodados no noso país, escoitamos os últimos traballos de Xosé Lois Romero e Aliboria, Lontras e Narci Rodríguez. Pechamos este bloque recuperando o máis que inquedo novo disco de Sofía Espiñeira. Na última parte do programa, escoitamos o primeiro sinxelo do novo disco de Lina —desta volta coa colaboración do autor irlandés Jules Maxwell—, ademais dunha peza extraída do último traballo de Rodrigo Leão.

Edición número 1450 de O Recanto do Corcovado. Puidestes escoitala o venres 9 de maio a través de RKV Radio Vigo, e o sábado 10 na sintonía de Cuac FM A Coruña, Rádio Filispim e da Radio Municipal de Redondela. Pechamos a rolda de emisións o mércores 14 a través de Radio Crónica Folk Musical. Esta semana propóñovos un programa cheo de transicións estéticas irreverentes. Todas elas beben da liberdade estética do jazz, mais dun xeito aberto e plural. Abrimos con Verónica Ferreiro e Javier Sánchez, aproveitando o concerto que deron no Teatro Colón da Coruña hai uns días. Ferreiro e Sánchez andan a presentar o seu novo repertorio, arranxado coa complicidade de Moisés Sánchez (piano), Ander García (piano) e Borka Barrueta (batería). A seguir, entramos de cheo nas últimas novidades. Chegan coa garantía de calidade dos selos Agogo Records, Lovemonk e Balaclava, entre outros. Escoitamos os últimos discos de Commonsur, Danzón el Gato, Gyedu-Blay Amboley, Roundabout e o Orbital Ensemble. Danos tempo, ademais, a escoitar dúas pezas extraídas do inclasificábel “Oide oide”, colaboración entre Brain Damage, Emiko Ota e Mad Professor.

Edición número 1449 de O Recanto do Corcovado. Puidestes escoitala o venres 2 de maio a través de RKV Radio Vigo, e o sábado 3 na sintonía de Cuac FM A Coruña, Rádio Filispim e da Radio Municipal de Redondela. Pechamos a rolda de emisións o mércores 7 a través de Radio Crónica Folk Musical. No programa desta semana saímos de ruta por Finlandia. Abrímolo con “Maa palaa” (A terra arde), o novo disco da cantante e violinista Päivi Hirvonen. Entra a seguir a última produción dos Vimma, un disco combativo no político e fondamente plural na súa definición musical. Escoitamos, ademais, os Ánnámáret Luohteilbmi, a nova banda da artista saami Anna Näkkäläjärvi-Länsman, así como o novo disco de Barbora Xu. Xu é unha multiinstrumentista checa que residiu en Finlandia durante algo máis de sete anos. Mestura na súa música elementos propios da tradición finlandesa con outros procedentes de Asia. Gravou o seu último disco, “The Garden of Otava”, coa axuda de grandes músicos do panorama finlandés. É o caso de Tapani Rinne e Ilkka Heinonen. Pechamos o programa co último disco da banda UTU.

Edición número 1448 de O Recanto do Corcovado. Puidestes escoitala o venres 25 de abril a través de RKV Radio Vigo, e o sábado 26 na sintonía de Cuac FM A Coruña, Rádio Filispim e da Radio Municipal de Redondela. Pechamos a rolda de emisións o mércores 30 de abril a través de Radio Crónica Folk Musical. “O rapaz da montanha”, o novo disco de Rodrigo Leão, será editado a través de Galileo Música esta mesma fin de semana. O disco foi definido polo seu autor como o seu traballo máis portugués, e presenta novidades estéticas e formais. Malia que siga a liña de traballo xa formulada en proxectos como “Cinema”, Leão xoga con novos elementos e timbres —a presenza dos coros é recorrente—, construíndo un repertorio de natureza contemporánea que conecta coa tradición da canción popular portuguesa. Este é o noso disco destacado da semana. Escoitamos, ademais, os novos proxectos do dúo Crúas e da banda Exeria, sen nos esquecer do último disco de Faia Díaz. A nosa singradura remata en Brasil: preséntovos as novas cancións do proxecto Tagua Tagua e do trío Trinka.

Edición número 1447 de O Recanto do Corcovado. Puidestes escoitala o venres 18 de abril a través de RKV Radio Vigo, e o sábado 19 na sintonía de Cuac FM A Coruña e da Radio Municipal de Redondela. Pechamos a rolda de emisións o mércores 24 de abril a través de Radio Crónica Folk Musical e o sábado 26 na sintonía de Rádio Filispim. O programa desta fin de semana está adicado, na súa práctica totalidade, a novidades galegas. Escoitamos as novas cancións das Fillas de Cassandra, Lontras, Faia e Mondra. Faia editará “Alvela” a vindeira cuarta feira, o 23 de abril. Presentarao ese mesmo día ao vivo no Teatro Principal de Santiago de Compostela. “De ronda”, o novo de Mondra, ten tamén dúas datas de presentación pechadas, ámbalas dúas na Sala Capitol de Compostela. Logo de se esgotar as entradas para o concerto do 10 de maio, vén de pecharse un novo concerto para o día 9 do mesmo mes. Escoitamos tamén varios temas extraídos do último disco de Sofía Espiñeira, ademais de recuperar unha das pezas de “Basal”, da Pedreira. Lembrade que, na nosa opinión, este foi o mellor disco galego do pasado 2024. Recuperarémolo para comentar a súa candidatura a dous certames diferentes: compite nos Premios MIN na categoría adicada ao mellor disco en galego, e nos Premios da Academia da Música como mellor disco folclórico. Completamos o programa co último disco do cubano Raúl Paz e cun adianto de “Cacofonia”, o último traballo do artista brasileiro Gabriel da Rosa. Este último será publicado oficialmente o vindeiro 6 de xuño.

Edición número 1446 de O Recanto do Corcovado. Puidestes escoitala o venres 11 de abril a través de RKV Radio Vigo, e o sábado 12 na sintonía de Cuac FM A Coruña e da Radio Municipal de Redondela. Pechamos a rolda de emisións o mércores 16 de abril a través de Radio Crónica Folk Musical e o sábado 17 na sintonía de Rádio Filispim. O selo ECM segue a recuperar material inédito gravado por Keith Jarret. A finais do pasado ano saiu ao mercado “The Old Country”, disco onde se recollen oito pezas gravadas no mítico Dear Head Inn. Acompañaron a Jarret Paul Motian á batería e Gary Peacock ao contrabaixo. O nivel de entendemento e compenetración musical existente entre estes músicos era, e é, extraordinario. Con eles abrimos o programa desta fin de semana. Descubrimos, ademais, “Trio”, traballo liderado polo contrabaixista sueco Lars Danielsson. Gravouno con Verneri Pohjola (trompeta) e John Parricelli (guitarra). Dende o selo Wejazz chegan ás nosas mans dous discos que van ser publicados ao longo dos vindeiros meses. O primeiro, “Traces”, da banda Cosmic Ear. Están liderados por Christer Bothén, quen no seu momento traballou con Don Cherry durante o periplo sueco deste último. O disco funciona como unha prolongación desa colaboración: converxen nel jazz contemporáneo e raíces africanas e ibéricas, dando como resultado unha música complexa e inclasificable. O disco publicarase o vindeiro 23 de maio, mais pódovos presentar o primeiro sinxelo. A segunda novidade publicada por Wejazz chegará a finais do presente mes de abril. Trátase do primeiro disco como líder do saxofonista Jussi Kannaste. Completamos o programa dende Galiza cos últimos traballos de Abe Rábade e Baldo Martínez, dous dos mellores discos galegos do pasado ano 2024.

Edición número 1445 de O Recanto do Corcovado. Puidestes escoitala o venres 4 de abril a través de RKV Radio Vigo, e o sábado 5 na sintonía de Cuac FM A Coruña e da Radio Municipal de Redondela. Pechamos a rolda de emisións o mércores 9 de abril a través de Radio Crónica Folk Musical e o sábado 10 na sintonía de Rádio Filispim. “Xeografías”, o novo disco de Sofía Espiñeira, xa está nas tendas. Funciona como unha reflexión sobre o corpo, entendido este coma un territorio físico que ocupa un espazo dentro na natureza. A natureza, en si mesma, devén a casa onde o corpo vive. Este é un dos nosos discos destacados da semana. Escoitamos, ademais, os novos sinxelos de Fillas de Cassandra, Casapalma e Rodrigo Leão. Na segunda parte do programa descubrimos “Chiripa”, disco creado polo artista vigués Marco Maril. Este traballo foi construído usando técnicas e estratexias de composición autoxenerativa, mais sen botar man da IA. Completamos o programa con Maria João e o dúo Marco Mezquida & Lina.

Edición número 1444 de O Recanto do Corcovado. Puidestes escoitala o venres 28 de marzo a través de RKV Radio Vigo, e o sábado 29 de marzo na sintonía de Cuac FM A Coruña e da Radio Municipal de Redondela. Pechamos a rolda de emisións o mércores 2 de abril a través de Radio Crónica Folk Musical e o sábado 6 na sintonía de Rádio Filispim. O corpo como espazo de experimentación e reflexión convértese no tema central do programa desta fin de semana. Abrímolo con “O fado”, disco de Lina e Marco Mezquida. Sorprende comprobar como Mezquida fai do seu piano unha prolongación do seu propio corpo, dándolle unha dimensión mesmo física. Isto permite que o diálogo coa voz de Lina adquira un carácter material fecundo e engaiolante. Os últimos sinxelos de Mondra, as Fillas de Cassandra e Faia tamén parten da reflexión sobre o corpo para, a seguir, introducir ideas diferenciadas sobre o pracer, a sexualidade e o lugar que este ocupa no espazo físico. Non son estes os únicos temas novos que escoitamos. Preséntovos, ademais, os últimos sinxelos de Tagua Tagua, Luís Peixoto, Catuxa Salom e Joana Dark e Casapalma. Ademais, escoitamos a Xabier Díaz para falarmos da publicación do seu libro “Cancioneiro galego serodio 1989-2012”. Completamos o programa co “Negra sombra” de Narci Rodíguez e o último disco da cantora arxentina Guada.

Edición número 1443 de O Recanto do Corcovado. Puidestes escoitala o venres 21 de marzo a través de RKV Radio Vigo, e o sábado 22 de marzo na sintonía de Cuac FM A Coruña e da Radio Municipal de Redondela. Pechamos a rolda de emisións o mércores 26 a través de Radio Crónica Folk Musical e o sábado 29 na sintonía de Rádio Filispim. O pianista armenio Tigran Hamasyan publicou na recta final do pasado ano “The Bird of a Thousand Voices”, proxecto baseado na lenda do Hazaren Bibul. Vén acompañado dun videoxogo en liña, unha instalación multimedia e un disco impoñente. Hamasyan volve mesturar tradición armenia, jazz eléctrico e aires progresivos para crear unha música dunha complexidade e beleza notábeis. Con el abrimos o programa desta semana. Preséntovos, ademais, as últimas novidades do selo WeJazz. A primeira, o esperado novo disco de Timo Lassy, gravado ao vivo no GLivelab de Helsinki. Será publicado oficialmente esta mesma fin de semana. A segunda, o primeiro sinxelo extraído de “Out of Self and into Others”, o primeiro traballo como líder do saxofonista Jussi Kannaste. Sairá á rúa o vindeiro 25 de abril. Completamos o programa co jazz intrépido do cuarteto PIIP, acrónimo de “Pienet ihmiset isot puut” (Pequenos seres humanos, grandes árbores). Os PIIP están liderados pola saxofonista Laura Helander, quen nos ofrece un disco de carácter conceptual onde reflexiona sobre as conexións existentes entre a natureza e o ser humano.

Edición número 1442 de O Recanto do Corcovado. Puidestes escoitala o venres 14 de marzo a través de RKV Radio Vigo, e o sábado 15 de marzo na sintonía de Cuac FM A Coruña e da Radio Municipal de Redondela. Pechamos a rolda de emisións o mércores 19 a través de Radio Crónica Folk Musical e o sábado 22 na sintonía de Rádio Filispim. No programa desta semana andamos ás voltas, de xeito aberto, co concepto “canción de autor/a”. Farémolo a través dos últimos sinxelos de Guada, La Torre, Las Nietas del Charli e máis Narci Rodríguez. Entramos de cheo, ademais, na fusión entre rock underground, arranxos psicodélicos e actitude sincrética dos Nusantara Beat, banda holandesa de raíces indonesias. Veñen de publicar con Bongo Joe un primeiro EP absolutamente abraiante. Escoitamos a seguir as últimas producións do selo Lovemonk: Marina y su Melao, Commonsur e Danzón el gato, proxectos que van da fusión afrocaribeña ao jazz máis irreverente, pasando polo trip-hop de vangarda. Completamos o programa cos últimos traballos de Gitkin e Silvan Strauss.

Edición número 1441 de O Recanto do Corcovado. Puidestes escoitala o venres 7 de marzo a través de RKV Radio Vigo, e o sábado 8 de marzo na sintonía de Cuac FM A Coruña e da Radio Municipal de Redondela. Pechamos a rolda de emisións o mércores 12 a través de Radio Crónica Folk Musical e o sábado 15 na sintonía de Rádio Filispim. Escoitamos os últimos discos de Maria João, Lionel Loueke & Dave Holland, Nikita Rafaelov, Kali Trio e Ilja Ruf.

Edición número 1440 de O Recanto do Corcovado. Puidestes escoitala o venres 28 de febreiro a través de RKV Radio Vigo, e o sábado 1 de marzo na sintonía de Cuac FM A Coruña e da Radio Municipal de Redondela. Pechamos a rolda de emisións o mércores 5 a través de Radio Crónica Folk Musical e o sábado 8 na sintonía de Rádio Filispim. Os finlandeses Frigg son, con diferenza, unha das mellores bandas de música folk e tradicional de Finlandia. Veñen de editar “Dreamscapes”, un disco tecnicamente impecable, cheo de arranxos creativos e interpretacións notables. Este é un dos nosos discos destacados da semana. Dende Finlandia preséntovos, ademais, o novo disco do trío Áššu. A banda está liderada por Ulla Pirttijärvi, unha das mellores intérpretes de canto joik dos países nórdicos. No primeiro bloque do programa, porén, escoitamos os primeiros adiantos de dous proxectos latinoamericanos. O primeiro, “Viaje sideral”, o novo do trompetista colombiano El León Pardo. O segundo, “Sol”, novo traballo de música afrovenezolana de Raúl Monsalve y los Forajidos. Damos nos dous discos con fusións inauditas entre psicodelia, música afrocaribeña, jazz e vangarda. Completamos este bloque co novo sinxelo da banda Ukandanz, quen anuncian novo disco para mediados de abril, e co último EP dos Trinka. Na recta final do programa danos tempo a escoitar o disco colaborativo “Nouse luonto”.

Edición número 1439 de O Recanto do Corcovado. Puidestes escoitala o venres 21 de febreiro a través de RKV Radio Vigo, e o sábado 22 na sintonía de Cuac FM A Coruña e da Radio Municipal de Redondela. Pechamos a rolda de emisións o mércores 26 a través de Radio Crónica Folk Musical e o sábado 29 na sintonía de Rádio Filispim. “Feira”, o novo disco da banda De Ninghures, xa ten data oficial de publicación: terédelo na rúa dentro de poucos días, o vindeiro martes 25 de febreiro. Aproveitando esta circunstancia, no programa desta semana escoitamos os últimos sinxelos publicados pola banda. Estreamos, ademais, os últimos temas presentados por Rodrigo Leão, Baiuca e máis Guada. Leão editará o seu novo disco, “O rapaz da montanha”, o vindeiro mes de abril, mais vén de presentar o seu segundo adianto. Baiuca asina coa cantora vasca Izaro e os Oreka TX unha revisión máis que inqueda de “Xorieri”, un dos temas clásicos do repertorio de Erramun Martikorena. Guada, pola súa banda, adianta coas súas últimas cancións a publicación de “Algo familiar”, disco que estará nas tendas a finais do mes de marzo. Completamos o programa cos novos traballos de Omiri, A Banda da Loba, Resaca Emocional e a cantora de orixe sevillana María Yfeu.

Edición número 1438 de O Recanto do Corcovado. Puidestes escoitala o venres 14 de febreiro a través de RKV Radio Vigo, e o sábado 15 na sintonía de Cuac FM A Coruña e da Radio Municipal de Redondela. Pechamos a rolda de emisións o mércores 19 a través de Radio Crónica Folk Musical e o sábado 22 na sintonía de Rádio Filispim. Estruturamos o programa desta semana en dous bloques diferenciados. No primeiro, entramos de cheo na fusión internacional cos novos discos de Jupiter & Okwess e da banda Dowdelin. Na segunda parte do programa desprazámonos até Finlandia para escoitar “Joku raja rakkaudessakin” (No amor tamén debe haber algún límite), o novo traballo dos Pauanne. Descubrimos, ademais, o disco colaborativo “Nouse luonto” (Arriba, natureza), onde participan diferentes artistas de Finlandia. O obxectivo do disco é fondamente político: o disco foi creado como mecanismo de defensa e conversación da biodiversidade do país nórdico. Colaboran, entre outros nomes, Kimmo Pohjonen, Maria Kalaniemi, Maija Kauhanen e Akkajee. Na recta final do programa seguimos a explorar o repertorio do novo disco da banda UTU.

Edición número 1437 de O Recanto do Corcovado. Puidestes escoitala o venres 7 de febreiro a través de RKV Radio Vigo, e o sábado 8 na sintonía de Cuac FM A Coruña e da Radio Municipal de Redondela. Pechamos a rolda de emisións o mércores 12 a través de Radio Crónica Folk Musical e o sábado 15 na sintonía de Rádio Filispim. Os galegos Sumrrá están de festa: no presente ano celebran o seu vixésimo quinto aniversario. No programa desta semana aproveitamos esta circunstancia para recuperar a súa música e para introducir diferentes novas relacionadas coa banda: preparan xira e novo disco, o cal sairá á rúa a finais do presente ano 2025. Ben de cheo no mundo do jazz, escoitamos tamén as últimas producións do selo WeJazz, as asinadas por Joona Toivanen e Timo Lassy. Conectámolas con “Moondial”, o novo traballo para guitarra soa de Pat Metheny, prolongación filosófico-musical do seu anterior “Dreambox”. Na recta final do programa descubrimos “Azken uda”, o último disco do trompetista bilbaíno Juan de Diego. Despedímonos con “Grande-Terre”, disco gravado por Roy Hargrove no ano 1998 que vén de ser editado hai escasos meses.

Edición número 1436 de O Recanto do Corcovado. Puidestes escoitala o venres 31 de xaneiro a través de RKV Radio Vigo, e o sábado 1 de febreiro na sintonía de Cuac FM A Coruña e da Radio Municipal de Redondela. Pechamos a rolda de emisións o mércores 5 a través de Radio Crónica Folk Musical e o sábado 8 na sintonía de Rádio Filispim. A Banda da Loba vén de presentar ao vivo o seu novo traballo, “Lovismo”. Aproveitando esta circunstancia, escoitamos varias pezas do disco. O programa desta semana está cargado de novidades discográficas. Dende Portugal escoitamos os novos sinxelos de Rodrigo Leão e Omiri. O primeiro, “O rapaz da montanha”, forma parte dun disco que aínda non ten data de saída. Omiri, porén, anuncia o seu novo disco para o 7 de febreiro. Leva por título “Modas novas e algumas velhas”. Conectámolo co último sinxelo dos De Ninghures, “O último bale”. Completamos o programa con máis novidades: saltamos do novo EP do trío Trinka á nova música do artista de Compostela Ronroneo, sen nos esquecer das últimas producións da cubana Rita Donte e de Amparo Sánchez.