Podcast Radio Cerna

O TSXG paraliza cautelarmente a orde que permite cazar lobos en Galiza. ADEGA presenta ao Estado argumentos sólidos e baseados na ciencia para manter esta especie como estritamente protexida na Directiva Hábitats da UE. E seguimos nos tribunais: a Xustiza europea avala o veto á pesca de fondo en 87 zonas sensibles do Atlántico nordeste. Unha vertedura de xurros arrasa o río Landro. Todo isto e máis, en Radio Cerna!

A asociación ecoloxista ADEGA fai 50 anos de historia e festéxao cun gran festival en Lugo este sábado 7 de xuño. Ao tempo, abre novas vías de loita contra a celulosa de Altri: presenta na Xunta de Galiza máis de 1.400 solicitudes para reclamar o arquivo inmediato do expediente de tramitación da concesión de augas; e esixe á Xunta que anule a DIA da macrocelulosa por incumprir, a sabendas, unha sentenza do Tribunal de Xustiza da UE. E as rúas volven falar: multitudinaria manifestación en Pontevedra contra o modelo industrial que representan Ence e Altri este pasado domingo, 1 de xuño. Todo isto e máis, en Radio Cerna!

ADEGA e PDRA dan inicio á contenda xudicial contra o proxecto de instalación da macrocelulosa de Altri na Ulloa. E esta semana, coincidindo coa celebración do Día Europeo da Rede Natura 2000 e do Día Internacional da Diversidade Biolóxica, diversos colectivos ecoloxistas galegos reclaman a ampliación desta rede de espazos naturais protexidos en Galiza. Ao tempo, a Xunta de Galiza vén de declarar a utilidade pública do parque eólico de Castro Valente, malia estar suspendido cautelarmente polo TSXG. Todo isto e máis, en Radio Cerna!

A directora xeral de Patrimonio Cultural da Xunta dimite despois de asinar o polémico informe que avalaba o proxecto de Altri en Palas de Rei. Mentres, a multinacional portuguesa reforza a súa presenza en Galiza e pecha a compra de Greenalia Forest e Greenalia Logistics. O Tribunal Superior de Xustiza da Galiza decretou a suspensión cautelar do parque eólico de Seselle, en Oza-Cesuras, por risco de dano a valores ambientais sensibles. Isto e máis, en Radio Cerna!

O 90% dos informes que sustentan a declaración ambiental positiva da macrocelulosa de Altri na Ulloa foron asinados por cargos de libre designación da Xunta. A empresa recoñece, ademais, que non pagará polos 381 predios que pretende atravesar cunha condución de auga. O PP veta que a Lei da minaría dea cabida á participación social, e co seu voto impide que o Parlamento se posicione sobre a mina de Doade. Nace o Fondo para a Protección do Lobo Ibérico, unha iniciativa apoiada por máis de 25 entidades do Estado e de Portugal que busca defender esta especie fronte á súa polémica desprotección legal. Isto e máis, en Radio Cerna!

O Goberno español deixa finalmente fóra do Perte de descarbonización a multinacional portuguesa Altri, que se enfronta a unha das maiores contestacións sociais en defensa do medio ambiente das últimas décadas en Galiza. Para mostra, o éxito das campañas de micromecenado para financiar a loita xudicial contra o proxecto. Organizacións ecoloxistas e sindicais demandan, ademais, unha moratoria indefinida para as novas plantacións de eucalipto. ADEGA-Lugo denuncia que as inundacións provocadas polas pasadas choivas torrenciais son consecuencia directa dun modelo urbanístico que ignora os ríos e impermeabiliza a cidade. Todo isto e máis, en Radio Cerna!

Xustiza para o Ulla reúne máis de 35.000 euros en pouco máis de 10 días para a defensa xurídica do Ulla fronte á macrocelulosa de Altri e a mina de Touro. En canto a esta última, o presidente da Xunta, Alfonso Rueda, mantén a súa reapertura como proxecto industrial estratéxico malia pedir cárcere a Fiscalía para os responsables da antiga explotación. As emisións industriais de gases de efecto invernadoiro caeron un 24% en Galiza durante 2024. A crise dos 'pellets' impulsa a Unión Europea a aprobar novas regras para reducir os vertidos. Isto e máis, en Radio Cerna!

Masiva protesta contra Altri e a mina de Touro-O Pino na Pobra do Caramiñal, por mar e por terra. Unha mobilización histórica que, de novo, Rueda e o PP galego minimizan. A mina de litio de Doade, en Beariz, a piques de saír a exposición pública tras ser seleccionada por Bruxelas como proxecto estratéxico para Europa. Veciñanza da Baixa Limia demanda á Xunta pola contaminación do encoro das Conchas. Todo isto e máis, en Radio Cerna!

Altri si. A Xunta de Galiza declara compatible co medio ambiente a macrocelulosa de Altri e Greenalia en Palas de Rei. Faino ás portas da gran mobilización contra este proxecto e a mina de Touro-O Pino na Pobra do Caramiñal. Entidades ecoloxistas presentan a Declaración "Por unha Lei de Montes Veciñais ao servizo da veciñanza comuneira e das maiorías sociais". E ademais, O Tribunal Supremo vén de inadmitir os recursos presentados pola Xunta de Galiza e as empresas promotoras contra a paralización cautelar dos proxectos eólicos de Rodeira, Pico Seco e Troitomil. Todo isto e máis, en Radio Cerna!

O Tribunal Superior de Xustiza de Galiza tomba a privatización por parte da Xunta dos procedementos de avaliación ambiental. Máis de 500 barcos de pesca e mexilloeiros percorrerán a Ría de Arousa contra Altri e a Mina de Touro o próximo sábado, 22 de marzo. Os trámites da concesión de augas para as centrais de bombeo na Ruña, en Mazaricos, tamén terían caducado, ao igual que os de Altri. O xacemento arqueolóxico da Roda de Barreiros, na Mariña, atópase nun estado de abandono que ameaza a súa conservación. Todo isto e máis, en Radio Cerna!

ADEGA demanda a Xunta pola desprotección da área afectada pola celulosa de Altri na Infraestrutura Verde de Galiza. E mentres, a Xunta continúa coa súa manobra para eludir centos de alegacións cun requirimento masivo a máis de 800 persoas para que demostren a súa condición de interesadas no expediente do proxecto. Por mar e por terra. A plataforma en Defensa da Ría de Arousa anuncia unha gran mobilización contra Altri e contra a Mina de Touro-O Pino. Todo isto e máis, en Radio Cerna!

A Xunta de Galiza reduce a protección ambiental dos terreos da Ulloa onde Altri quere instalar a súa celulosa. O presidente da Xunta evita dar explicacións e remítese de novo ao traballo do persoal técnico na declaración de impacto ambiental da planta. Veciñanza de Bembrive e Mós presentan 25.000 alegacións contra unha autovía que arrasará o seu pulmón verde. Isto e máis, en Radio Cerna!

A Xunta manobra para ampliar a balsa de lodos vermellos de Alcoa a pesar dos riscos medioambientais. Denegada a autorización ambiental ao proxecto da planta de biometano en Coeses, en Lugo. Entregan centos de alegacións contra a instalación dun vertedoiro a ceo aberto en Val do Dubra. O TSXG paraliza cautelarmente un proxecto eólico que ameazaba as bestas de Sabucedo. Isto e máis, en Radio Cerna!

A solicitude de concesión de augas de Altri tería que desestimarse por vencer o prazo legal para resolver. O proxecto estivo no centro dunha nova disputa esta semana no Parlamento de Galiza entre Rueda e Pontón. A empresa, pola súa banda, confirma que tramita co Ministerio de Industria unha axuda directa de 250 millóns de euros. En materia eólica, o Tribunal Superior de Xustiza de Galiza frea cautelarmente o proxecto eólico Zamorra, en Agolada, a instancias de ADEGA. A Confraría de Noia anuncia unha querela contra Naturgy pola morte do marisco. Todo isto e máis, en Radio Cerna!

O xornal La Voz de Galicia revela que o informe preceptivo de Augas de Galiza sobre a fábrica de Altri en Palas de Rei é favorable. 300 persoas implicadas, máis de 15.000 paus de batea recollidos e tan só 3 días de traballo: este é o balance final do Tarugotón, a primeira recollida simultánea de paus de batea en Galiza. ADEGA Vigo - O Morrazo vén de presentar alegacións fronte ao proxecto da autovía A-52. Galiza será a comunidade do Estado que máis terá que asumir na sanción imposta pola Unión Europea ao Estado español por non cumprir cos obxectivos de reciclaxe. Todo isto e máis, en Radio Cerna!

O actual proxecto mineiro de Touro, un risco para o ambiente e para a saúde aínda maior que o que implicaba o de 2017. Tamén en materia mineira, ADEGA denuncia á Xunta e ao Concello de Foz polas irregularidades na tramitación dunha canteira de caolín. O goberno galego comeza a tramitación dun novo plan eólico, sen que organizacións ecoloxistas e asociacións veciñais poidan participar nos órganos de decisión. Todo isto e máis, en Radio Cerna!

Noruega denega o permiso ambiental a unha celulosa coma a de Altri. Este domingo 26 de xaneiro, hai unha nova cita nas rúas coa defensa do medio ambiente e contra a invasión eólica. Tamén en materia eólica, ADEGA lanza unha campaña de recadación solidaria Ti Podes Paralos! para frear nos tribunais o proxecto eólico Patiñeiro, en Vimianzo. Desplome do marisco na ría de arousa, unha das principais zonas de cría do mundo. Todo isto e máis, en Radio Cerna!

Nova cita nas rúas galegas: o próximo domingo, 26 de xaneiro, a Coordinadora Eólica Así Non fai un chamado ao pobo galego a mobilizarse en diferentes puntos da xeografía galega contra a invasión eólica. Alerta no agro galego polas plantas de biometano que están a promover as empresas enerxéticas. A Xunta apraza a súa decisión sobre o proxecto de macrocelulosa de Altri. Todo isto e máis, en Radio Cerna!

O pobo galego protagonizou unha xornada de reivindicación histórica o pasado domingo en defensa da terra e contra a macrocelulosa de Altri. As reaccións políticas non se fixeron agardar. O presidente da Xunta, Alfonso Rueda, di manterse firme e coas cousas claras e a oponición ínstao a escoitar a cidadanía. Nesta mesma semana, a coordinadora Eólica Así Non concentrouse diante do Parlamento de Galiza para denunciar o constante acoso do Partido Popular sobre a veciñanza ameazada pola invasión eólica. ADEGA e o Concello de Santiago achegan a xestión sostible dos residuos e a compostaxe aos centros de ensino. Isto e máis, en Radio Cerna!

Facultades e departamentos de tres universidades e do CSIC ratifican o seu rexeitamento a Altri a unha semana da gran mobilización contra a macrocelulosa prevista para o próximo domingo, 15 de decembro, en Santiago de Compostela. Na mesma liña científica, vén de ver a luz o primeiro libro que aborda de forma exhaustiva os impactos sobre terra, mar e aire de Altri, da man de ADEGA e do biólogo Ramón Varela. Desde a ría tamén lanzan o seu NON ao proxecto, que suporía a estocada final a unha xa moi minguada produción na ría de Arousa. Ademais, a Coordinadora Eólica Así Non convoca unha concentración no Parlamento o próximo martes 17 para denunciar o constante acoso do PP sobre a veciñanza ameazada pola invasión eólica. Isto e máis, en Radio Cerna!