Apirilaren 15an ospatzen da mundu mailan Artearen Eguna. Arte-lanen garrantzia azpimarratzeaz gain, egun honekin sormenaren garrantzia aldarrikatu nahi da, pentsamenduaren bilakaerarako eta, are gehiago, gizakion arazoak konpontzeko.Gure podcastean ere, literaturaren eta artearen lotura oparoa aztertzeko aproposa dela iruditu zaigu, eta horixe izan da apirileko gure gaia.
Saio honetan hiru liburu izango ditugu mintzagai, bakoitza genero batekoa (saiakera, eleberria eta biografia) baina guztiak artearen ingurukoak, eta euskal idazleek idatziak.
• Zuloa, Xabier Gantzarain
• Azala erre, Danele Sarriugarte
• Frida Kahlo, Ana Irigoien
Gainera, amaieran, berriz ere Arantxa Coca izango dugu gurekin, Errenteriako Liburutegiko dinamitzailea: berak oso gomendio berezia ekarri digu oraingoan ere, benetan arte-lan bat den liburu bat.
Datorren hilabetean gai berri bati ekingo diogu: paperezko amak, amatasuna fikzioan, amak eta seme-alabak literaturan. Gogorarazi nahi dizuegu harpidedunak bazarete (edo izan nahi baduzue) berriz ere harpidetzea beharrezkoa dela; izan ere, 50 saioraino iritsi garenez, kanal berri bat ireki behar izan dugu, programa beraren barruan. Era horretan, automatikoki abisuak jasoko dituzue.
Comments